سـاوالان!

نـه‌دَن آغ کورکـه بو جور بورگلَنیب‌سن نییه نیسگیل توزونا چوخ بلَنیب‌سن دور کی ایمان باغی، گوج قایناغی، بیر ائـل داغی، سـن‌سن وطنین بایراغی، سـن‌سن قوجا تاریخ یولونون یورغونوسـان، ‌سن بو ائلین وورغونوسان، سن اؤلکه‌یه گؤز یاغی، سـن‌سن، دادی سـن‌سن، دوزو سـن‌سن اوبالار ایچره خیال‌لار گؤیونون اولدوزو، سـن‌سن ائله غیرت قانی، بیرلیک جانی، جان درمانی، سـن‌سن سینمایان قالخانی، سـن‌سن ساوالان! دور، داها سوسما آنـد ایچیبسن کی، اویاقسان، وطنه گوجلو دایاقسان داها اؤز آندینی قوسما اوزون ایل‌لردی سنی، شاختا کؤپَک حصره سالیب دیر بیلیرم من! اَلی ائل‌دن، دیلی اَل‌دن، گولو بولبول‌دن آلیب دیر بیلیرم من! دؤیولون گونده چالیب دیر بیلیرم من! بیز اویانساق، بیز ایله شاختا چالانماز داها یوردوم‌دا قالانماز، باج آلانماز ائلی پیس درده سالانماز، اوبامیز بیر ده تالانماز داها عشقین جامی اَل‌لـرده جالانماز بونو بیل، ظلم‌ایله هئچ کس اوجالانماز ! اوره‌یین گؤر نه سیجاق دیر ساوالانیم! ائله، بیر ایستی قوجاق دیر ساوالانیم! گؤیـه، یئردن اوجالان شانلی باشین وار گونه تای آرخاداشین وار بیلیرم گؤزده یاشین وار. دوزدو، زنجیره چکیب دیر سنی قیش حیلت اَلییله بونو بیلسین بونو بیلسین؛ ایته یا تولکویه آسلان کی، یئییلمز ! قارا ایت گئیسه‌ده آسلان دریسین ظلم اوجاغین‌دا یاتسا شیطان قوجاغین‌دا یئسه ده زور تاباغین‌دان، یئمه‌سه اؤز قاباغین‌دان اونا آسلان کی، دئییلمز ! دئه، یانیق آرزولارین قیش، کؤنولوندن داها سیلسین داها زنجیرده ده آسلان‌لاری او تولکو گؤرنمز بورادا تولکو تؤرَنمز ساوالان! گـول؛ یاشاسین اؤلکه‌ده بولبول سویون آغ کورکونو آت، بوستانی گولدور گولو دیندیرکی، اویانسین، اوزو گولسون دونو یوز رنگه بویانسین یازین عشقین‌ده دایانسین تاکی، بولبول گول اوچون منبره چیخسین سَسینه قارغا قاریخسین قارا گون بلکه داریخسین گـؤی‌ده آی، یاشماغین آچسین، ایشیغین هر یئره ساچسین گئجه‌نین باغرینی سیخسین شرفین، ذلّـتی ییخسین گئجه یانسین، یئنی بیرگوندوز اویانسین. گَل، اوتانماز دیکَنی ذیروه‌دن ائندیر کلَکین قـاز ! یئنه آزاده‌لییین دفترینه تورکون آدین یـاز ! حقّـی، حق کورسویه میندیر باشینی گـؤی‌لره قالـدیر یئره قوی زلزله دوشسون، قورخودان قیش دا بوزوشسون شپه قایسین تپه‌لردن، سولار آخسین شپه‌لردن اَریسین گؤی‌ده کولک‌لر، اویناسین‌لار کپنک‌لر نه گؤزل، دوغرو خیال دیر ! منیم عشقیم سنی بَک‌لر. وطنین دؤش داغی سـن‌سن ساوالانیم! بو ائلین گؤز یاغی سـن‌سن ساوالانیم! سن‌ایله وار هامی گول‌لر، دؤیونور سنده کؤنول‌لر سنه تای من ده سوروندوم گئجه-گوندوز، اوزون ایل‌لر نه شیرین، گوجلو دیلین وار اونا وورغون هامی دیل‌لر تورکو دیل‌سیز بو حیاتین دادی قالماز ساوالانین آدی قالماز توکَنَر ائل‌ده گؤزللیک، داها هئچ بیر زادی قالماز. ائلیمین کاروانی سن‌سیز یولا دوشمز آنالار قیزلاری‌نین ساچلارین ائشمز کؤنولوم دردیمی دئشمز چوخ زمان‌دیر اوجادان خلقه باخیرسان ائل غمین‌دن اَریییب، یاش کیمی گؤزلردن آخیرسان یئنه قانـدان گؤزونـه سورمه یاخیرسان. کیم اوزوب اَل اَته‌یین‌دن تئز اونون قارشی‌نا دوشمن ده سپیب دَن کی، توتولسون، آدی اؤلسون، دیلی سولسون اوتوروب عقلینه گولسون کولا بنزر اونو یولسون آرا وئرسین اونا کؤک‌دن، بهره‌سی اولماسین اؤک‌دن کی، ائلین بایراغی یاتسین، گونو باتسین اوره‌یین شاختا قووورسون دیلینه مین دیلی قاتسین وارلیغین بلکه سووورسون ساوالان! سؤیله بو غفلت‌ده یاتان کیمسه‌لری کیم بیر اویاتسین؟ دور اؤزون، دور ! بیزه پیس قصد ائله‌یَن اَل‌لرین آنجاق بیله‌یین وور دور امان دیر ! بو ائلین شمعینی یاندیر بیزه دیل، شانلی نشان دیر دئه، نشان ایتسه، ایتَر یول، ساغ اولار سول گوج اولار بیزده ضعیف کول بو سؤزو خلقه ایناندیر چکیرم گونده اورَک‌دن آجی بیر آه نه یامان سوچ، نه گناه‌ایمیش آی الله! آنانین دادلی دیلین‌دن اَلی اوزمک اوره‌یی دوشمنه سوزمک دوداغی جهل‌دن آنجاق ائلـه بوزمک اَن دایاز گؤل‌لری اوزمک یئنه یارب! بیزی آنلات یئنه صبحون خوروزون بیرکره بانلات یومولان گؤزلـر آچیلسین بلکه ائل دردینه بیر چاره ده قیلسین هامی‌نی حقّـه اینان‌دیر هامی بیلسین کی، وطن ملّـته جان دیر. ساوالان! دور یئنه قالدیر بو دیدَرگین‌لییی ائل‌لر آراسین‌دان سؤیله سئل‌لر ساراسین‌دان اوبالار بلکه یئنه قول- بویون اولسون سنین آنجاق تویون اولسون ائلیمیز بیرلییه بئل باغلاسا، سئل‌لر گؤتورنمز پاپاغین قیرتیجی یئل‌لر گؤتورنمز. ساوالانیم! بیلیرم ائل- اوبانین عشق اودونا گونده یانیرسان او دومان‌لار بورویَـن آرزولارین گونده آنیرسان بو آغیر دردی قانیرسان دورکی، تزویـر‌ایله بیرچوخ ساواشین وار بیرگونش‌دن تؤره‌نَـن دویغودان، اَل‌لرده داشین وار نئچه مین ایل بویو تاریخ‌ده یاشین وار بوردا بیر شانلی« سهند» آدلی سنین آرخاداشین وار وطنه بیر قاراوولـدو تورکمانچای محالین‌دان سنه « بوز قوش»دا اوغولـدو حیف‌کی بیر سارا تک ائل گلینین سئل‌ده بوغولـدو حله ده خان چوبانین گؤزلری یولدا ایسته‌ییرکی، سارایا عشقی دورولدا. او سارای سئل‌لره جان وئردی، شرف ائل‌لره قالسین خان چوبان بلکه اوجالسین، عشقین آردین‌دا قوجالسین گئتدی یار، سئل قوجاغین‌دا قالانیب غم یوکو سن آددا داغین‌دا « اِلیـار»ین کؤنلو قالیب غم باداغین‌دا حله ده شهره‌سی بیر نغمه‌دی بولبول دوداغین‌دا نه درین غصّه دیر الله! بو آخان آرپا چایین دا نه سیخیر باغریمی ائـل‌لر هارایین دا بو، آذربایجانیمین شانلی شرف قصّه‌سی دیر، بیل! بهره‌سیز کیم بو شرفدندی بو ائللر آراسین‌دا ؟ ائل قیزی سئل‌لره جان وئـرسه‌ده آنجاق شرفین یئل‌لره وئـرمز اؤزگه اَل‌لر داراغین، تئل‌لره وئـرمز آلار ائل‌لر قاداسین، ائل‌لره وئـرمز. ساوالان! گون باتیب آنجاق قارالیب قاش چوخ اورَک‌لر ده اولوب داش داش اورک‌لر ده اولوب ظلمته فـرّاش بیر بؤیوک ذلّـته یولداش هانی بیر باش؟ کی، اویانسین، سنی قانسین، وطنین عشقینه یانسین گئجه‌ قارشین‌دا دایانسین؟ ساوالان! دور بو یاتان‌لار قولاغین بور داها بو اؤلکه ده بیرلیک اوباسین قور بو قیزیل اؤلکه‌یه بیر باخ، آغین آل، جان قاراسین یاخ ایلدیریم‌لارکیمی بیر شاخ گئجه‌نین باغرینا اوخ تاخ دور گؤزل! دور کی، سحر یولدادی، یول‌دا حله غیرت داماری قولدادی، قول‌دا. دوزدو کؤنلون‌ده سینیق وار بیلیرم جان دولوسو سنده ایشیق وار اوجا بوی آرخاداشیم! دور، دورو گؤزلـرده یاشیم، دور سنه قرباندی باشیم، دور دور ایییدلـر اومودون الله-ا باغلار، یالوارارکن اونا، آغلار جان‌دا، جان قورخوسونون بورنونـو داغلار یاردیم آل حـقّ‌دن ائـت ائل‌لره یاردیم سؤیله جان وئرمه‌یی من حقّـه باجاردیم! یاپیش ائـل عنعنـه‌سین‌دن اَک اونا جان دنـه‌سین‌دن گئجه‌نین وور چنـه‌سین‌دن گونش اولسون ننـه‌سین‌دن قارالیق اؤلکـه ده ایتسین قارا یول‌لار داها بیتسین منـه‌ده بیرجه گووَن سـن سنه خایین دئییلم مـن! آدیم « اِلیـار»دی، قیلینجیم دا قلـم دیر وطن عشقین‌ده علَـم دیر هرگؤزل دویغویا توفان‌دا بلَـم دیر اوتانیر قین‌دا قیلینجیم قالا دوشمن قاباغین‌دا ائلیمین غملی چاغین‌دا اؤله ذلّـت چاناغین‌دا. شعریمین سؤزلری سؤزدور، ائله گؤزدور گئجه‌نین خرمنی‌نه، سینه‌ده کؤزدور آرزولار یایلاغی! دور عشقی هارایلا گولوشو ائل‌لره پایلا آرازین عشقین اونایلا تورکو دیل بیزده قورونسون، ائلیمیز گوجلو ائل اولسون گوجوموز سانکی سئل اولسون سن ده بیل، من ده بیلیم، قوی هامی بیلسین باشیمیز بیرجه بو دنیاده گرَک حقّـه اَییلسین اوزونو قوی فلک اؤپسون گئجه‌نین گؤزلری کؤپسون! وطنین ساغ دیـزی سـن‌سن منی سـن‌سن، بیـزی سـن‌سن باکی‌سی، تبریـزی سـن‌سن موتلولوق‌لار ایـزی سـن‌سن دور اوچارکن ائله اویغون یول آچاق بیز گونشه بیر قول آچاق بیز سَسله‌یَک موتلولوغو، عشقی، سئوینجی آی گؤزللیک‌ده بیرینجی! بیلیرم من یاشاماز ائل، یاشاماز دیل داها سـن‌سیز ساوالانیـم! ساوالانیـم! آی اورَک‌لـرده قالانیـم!.... .