قارا قیـش

باتیر آخشام چاغی‌دیرگون، قارالیر قاش‌لار اؤنوم‌ده گئدیرم چَنلی دؤنومده گئچیر ایندی منیم عمروم‌دن ایکیندی بانلاییر بایقوشو ظلمون دارالیرگون قاشین آلتین‌دان آخار قان گؤرورم گون یاتاغین‌دا بیر قارانلیق باتاغین‌دا. منی نیسگیل توزو باسدی گؤزومو قورخودان آسدی حله ده یول گئدیرم من گونشی بیر ده گودَرکَن، فَلَکی سیر ائدیرم من. چؤره‌ییم آزدی تاباق‌دا، بیلیرم قیش‌دا قاباق‌دا حله بیر باش، دئییرم کاش! اَلیم اؤزگورلویه چاتسین بو قارانلیق یئره باتسین! قارا یئل‌لر داها یاتسین، کؤنولوم غم داشین آتسین! کاش قیزیل بختیمی یار، بیر ده اویاتسین! گئجه سولسون، گونشیم پارلایاراق، شاختانی یولسون باتی‌سیز اؤلکه‌میز اولسون! یاز اویانسین، ابدیّـت یولون آچسین او گؤزل‌لر گؤزلی، قارشیما چیخسین، قولون آچسین! کؤنلومون بارماغی بال‌دا، گؤزوم اولسون یئنه خال‌دا گزیرم گؤر نـه خیال‌دا ! اونودوب جان، گئجه‌نین قویروغو دال‌دا چوخالیر چَـن، یئنه یانلیز گئدیرم من بئلـه حال‌دا ! اوندا گؤردوم کی، خزان یئل‌لری اَسدی، یولو کسدی کؤنولون یاپراغین اوغدو گولو بوستان‌دا دیدَرگین سالاراق، بیر قیشی دوغدو ائلـه کی، سالدی قاسیرغا بیر امان وئرمه‌دی قارغا بولبولون دار بوغازیندان دوغولان نغمه‌نی بوغدو. اونا سَس وئـردی قارانلیق، دئدی گَل، بوردایام آرتیق چوخ آجیق واردی سَسین‌ده آیـی بوغماق، آیـی‌نی قانشارا چکمک، غمی دوغماق دنـه‌سین دؤش‌لره اَکمک گولو اوغماق، گونشی یورغانا بوکمَک هوَسین‌ده اؤزو شیطان قفسین‌ده قوخویور قان نفسین‌ده! اوگون آخشام چاغی بیر شاختا، قارانلیق گیله گَلدی یئدی، سیرتیلدی، کؤکَلـدی دئیه‌سن، ظلمته اَلـدی! آتا مینمیشدی سازاق‌دان، یولا دوشموشدو اوزاق‌دان یاردیم آلمیشدی دوزاق‌دان دئمه یلـدا گئجه‌سی‌ایمیش گونشین دار قفسی‌ایمیش قار اَلَنـدی، اَلَنَرکن سپه‌لَندی اوجا داغلار شپه‌لَندی. بو دؤنم، سانکی خزاندان دوغولان بیر قارا قیش‌دی! جانیم اوندان، چوخ آلیش‌دی آیاغیم قاردا، باشیم قیردادی گؤردوم اوره‌ییم خیردادی گؤردوم قارا گیردیم، یولومو بیردن ایتیردیم ائله بیر کؤلگه، قارانلیق‌دا بیتیردیم چیغیریردیم، باغیریردیم من اورَک‌دن هامینی یاردیما، یانلیز چاغیریردیم. دئیه‌سن سون نفسیم‌دیر ! بوغولان، قاردا سَسیم‌دیر ! هامی‌لار سانکی یاتیب‌لار، گونشی بیر دوشونَن یوخ قارا قیش‌دان اوشونَن یوخ سؤز وئریب قیش، ائـده ابلیسه داها بیر نئچه خدمت گؤیـه یوکسل‌ده قیامت اونلا بیر قالماق اوچون باغلاییب ایلغار اولا ائل قارشینا دیوار سالا ائل‌لر باشینا هرنه کی، هیزلیک‌ده اویون وار دئیه تحقیر ایله باخ گؤر نه تویون وار وئـره قوردون اَلینه هرنه قویون وار چکه زنجیره او، هر یئرده بویون وار اونا بیزدن آلا بیعت بویون اَیسین ده طبیعت ائـده بولبول‌لری سونسوز یازی دونسوز قورا هر قارغایا منبر، ائده شیطان سؤزون ازبر سپه یئل‌لرده، اویاق گؤزلره قنبر سالا انسانلیغا قیرغین، بو دؤنوم‌لر آراسین‌دا ابدی چیرک ائده انسان یاراسین‌دا اؤلـه اَردم، سینا دوز یول‌دا قـدم‌لر یاییلا اؤلکه‌ده انسان دؤشونه ییرتیجی غـم‌لر. نه‌دیر آماجی قیشین؟! بَللی‌دی یاخماق، کؤمورون‌دن یاشاما هئی قارا یاخماق هامی‌نی ذلّـته تاخماق داها ابلیسه بوراخماق. سَسیمی بوردا دویان یوخ ! نـه‌دَن ابلیسه اویان چوخ ؟! بو قارانلیق‌دا یازیق من، نه بیلیم یولدو هایاندان؟! جینقیریم چیخمادی بیر آن باتـی‌نی توشلایاراق من یئنه سوسقون داها یورغون، یولا دوشدوم ساغا، هردن سولا دوشدوم. دورمادان، من گئدیرم هئی! یاری تکبیر ائدیرم هئی! یاردیم اولموش یئنه یاردان آشیرام گؤر نئچه مین قارلی دوواردان نفسیم قاش‌دا دونوبدور اوجو کیپریک‌ده، قونوبدور حله قارشیمدادی وحشت دیکه‌لیب چؤل‌ده قیامت دؤنورم هر یانا، قوردون گؤزو بَللی گؤزومه هر بیری اَللی. اولاشیرلار تپه‌دن قارلار آشیرلار، منه آرتیق سوواشیرلار بوز ایلان تک دولاشیرلار تور آچیر هر یئره قاردان، منی قویسون اوجا یاردان پایین آلسین بو قوماردان قارا قیش سانکی مین اَللی! قیرا بنزرگئجه دیر، یوخدو بیر اولدوز باخیرام چایلاغا، قات- قات گؤرورم بوز منه شیطان‌لار آتیر اوخ، آریق آی‌دان دا خبر یوخ! یاراما سانکی قارانلیق دا سپیر دوز گؤیو توتموش‌ دا بولودلار تالانیر من‌دن اومودلار قانا اومماق، جانا جومماق‌دا سازاق‌لار سارالیر من‌ده دوداق‌لار داشینیر قار تپه‌لردن، اوبا قورسون شپه‌لردن. قاریشیب قاردا قارانلیق بورویوب عقلی دومانلیق نئجه سیرتیق بوراغان دیر، آلاچالپوو ووراغان دیر یازا گَلمک، گوله گولمک قاداغان دیر ! سووورور قار، قارا یئـل‌لر آغاریر باش‌داکی تئـل‌لر نه‌دَن اویموش، داها ائـل‌لر ؟! دئییرم هئی! دئییرم هئی! سیخی‌دان، چاتلادی باغریم یاییلیب جانـدا باش‌آغریم یانیرام من بئله محنت اوجاغین‌دا اَن قارانلیق بوجاغین‌دا ! بیرکرم قیلدی یاریم، یاردیما گَلـدی گئجه‌دن بیر باجا دَلـدی یارین عشقین‌دن ایشیق، جاندا ساچیل‌دی گئجه قیوریل‌دی، آچیل‌دی سانکی اویموشدوم اؤزوم، بیردن اویاندیم یاری آندیم، بوتون اویموشلارا یاندیم من، آغیر ذلّـتی داندیم یارا جان، بیرجه گووَندی، اونون عشقییله بزندی قورخولار من‌ده توکَندی. گئجه قارشین‌دا دایاندیم دئدیم، آرتیق شرفی وئرمرم اَل‌دن، سارایی آلسا دا سئل‌لر اویانین سیز ده، آی ائل‌لر! باغلییام الله-ا عشقین اَته‌یین‌ده، دورارام من بئله دین‌ده تویوق اولماز کیشی، نین‌ده! کیشی‌لر ظلمته آنجاق بویون اَیمز گؤزون آرتیق اونا یومماز گونشین کؤنلونه ده‌یمز، گئجه‌لردن ایشیق اومماز. باسیب انسانلیغین اوستون بیر آغیر قار ایندی یاردیم گرَکیر ائل‌لره، « اِلیـار»! بئله سسلن دئدی بیردن منه وجدان: -اویان انسان! اویان انسان! چکر آنجاق یاتانین اوستونه یورغان، دئییرم قیش قیشا یاتماق، گلـر آلقیش تالانیر سن‌ده، آییل گؤر نئجه وارلیق! قیش ائدیب هر یئری قارلیق بوغولور قاردا چیمن‌لر، آزالیر عشقی اَمَن‌لر یوخ اولور قوش‌لارا دَن‌لر دیکه‌لیر گؤر نه دیکَن‌لر یئکه‌لیر شیطان اَکَن‌لر. اویان انسان! اویان انسان! بو آغیر دردی قان انسان! اولما شیطان‌لارا ساغ قول، اوره‌یین‌دن بزه‌یین یول بیرجه بیر الله-ا قـول اول! آییلین آی باشی دنیایه قاتان‌لار ! شرفی ظلمه ساتان‌لار ! آدی ذلّـت‌ده باتان‌لار ! قارا بختین‌ده یاتان‌لار ! گونشی گؤزدن آتان‌لار ! عقلی‌نین شمعی یانان‌لار، گئجه‌یه دالدالانارمی؟ او یاشیل دونلو یازین شوقونو کؤنلون‌ده دانارمی؟ اویان انسان! داها دور، شاختادا یانما بو قارانلیق‌دا دایانما قارالیقدان دور آرین بیر، دورولوب عشقه سارین بیر کؤنلون آل، نازلی یارین بیر زهله‌سیز قیش‌دان آییر یول گوجه بیر دول اوزونه بیرجه توپور سن زیبیلین جان‌دا سوپور سن قیش‌ایله قالماغی مان بیل، یاشامین چرچیوه‌سین سیل گله‌جک اؤلکه‌یه یازگیل، گوله‌جک نازلی شیرین‌دیل دئیه‌جکدیر یئنه هر نغمه ده بولبول کی، قیش اؤلسون گول آچیلسین، یاشاسین عاشقی مین ایل قارا گون‌لر بیته‌جکدیر، گئجه گؤزدن ایته‌جکدیر گؤزه‌لر قاینایاجاق‌لار، قوزولار اوینایاجاق‌لار یازی آیدین دویاجاق گؤز وئره‌جک، یاز دا ، شیرین سؤز گونشی گولدوره هرگون گولون عمرون سوره هرگون ائـده بیر اینجی، سئوینجی، یایا بوستان‌لارا اینجی یئنه انسان اولا قیمت‌ده بیرینجی اگر انسان یارا اویسا، قولاغی حق سؤزو دویسا ! قیشین عمرون گودورم من، بو ایتیک یول‌دا گئدرکَن او بیاض فرشی دیدَرکن دئییرم اؤز ایچریم‌ده، بو جانیم یانسا، دریم ده ؛ گؤزوم آرتیق او کریم‌ده. اوره‌ییم بیردن ایشیقلاندی سؤزوم‌دن قارا قیش دوشدو گؤزوم‌دن منه گوج گلدی یاریم‌دان اوره‌ییم بیر ده یئکَلـدی غمین آلتین‌دا بوکولموش بویوم آنجاق کی دیکَلـدی. حله عشقین یوکو سیرتیمدادی قارداش! بیتمز عشقین دادی قارداش! نه قدر قار قالین اولسا، بو آیاق‌لار یالین اولسا منی قیش دوردورابیلمز داها کؤنلوم‌ده، قارانلیق اوباسین قوردورابیلمز یارین عشقین وورابیلمز. گئدیرم یول ساواشارکن، اوجا داغلاردان آشارکن بیر اوچان قارتالا بنزر شپه‌لر وار، یالا بنزر عشقدن بیر قانادیم وار بیتمیشَم یاردا، منیم بیرجه آدیم وار. سن ده گَل، اول منه یولداش، داها قارداش! گئچرَک بیز بو سیناق‌دان، آتاق ابلیسه قیران داش! بودور آرزوم کی، یاز اولسون، بو قیشین عمرو آز اولسون بوتون اَل‌لرده ساز اولسون، آجیلیق‌لار دایاز اولسون اوجا محموده جانیم بیر ایاز اولسون. یئنه دان اولدوزو چیخسین گئجه‌نین باغرینی سیخسین، بو قارانلیق‌لاری ییخسین فلکین گول قیزی گولسون ایشیق ائل‌لرده یاییلسین، بشریّت بیر آییلسین چیمنین یارپیزی گولسون شیطانین باغری اوزولسون. داها ظلمون ده داغیلسین یئرین اوستون‌ده دیبَردی بیتیریلسین داها کسکین گؤزل انسانلیغین آنجاق کی، بو دردی بوتون اَل‌لـر گؤیـه چاتسین یئنه دیل‌لـر گوله باتسین دیله‌سینلـرکی، آی الله! گئجه‌نی قویلا قینین‌دا تا سنین اَن یاخینین‌دا ابدی بیرگولوش اولسون داها انسان دوداغین‌دا موتلولوق‌لار سیجاغین‌دا ابدیّـت قوجاغین‌دا... .