آی منه مـن‌دن یاخیـن!

باغلامارام باشقاسینا بئل، ساقین آی گؤزلیم! آی منه من‌دن یاخین! سن نه گؤزلسن، نه گؤزلسن، گؤزل! یوخدو سنین اوستونه بیر آیری اَل. سؤیله‌ییرم من داها بیردیر سایین دهرده یوخدور سنین آنجاق تایین. هم یئرین آلتین‌دا، گؤی اوستون‌ده‌سن آی‌داسان، اولدوزدا و هم گون‌ده‌سن. ذرّه‌ده سن‌دن بیلیرم بوش دئییل بیزده اینانج اولماسا، جان خوش دئییل. بیر سنه یئر-گؤی دایانیب دیرگؤزل! سن‌دن ایشیق‌لار اویانیب دیرگؤزل! سن یارادیبسان هامینی، هر زادی هرنه تانیش دیر سنه؛ یوخدور یادی. یاخشیلیغین، گول- چیچه‌یین گؤسترر گول دیله‌یَن، گول، اَته‌ییندن درر. سن نئجه هر زلفه داراق وئرمیسن عشقی ده انسانه یاراق وئرمیسن. هئچ اولابیلمز سنه بیر ایش چتین هئچ زادا یوخدور دا سنین حاجتین. هر ایشه عالم‌ده یاراتدین قیلیق سن‌دن آخار چای‌لارا تای، یاخشیلیق. مرحمتین‌دن بیزه یاغمور یاغیر لطف ائله‌ییبسن بیزه اَن چوخ، آغیر. کیمسه آتانماز سنه منّت داشین قالدیرابیل‌مز گؤیه سن‌سیز باشین. کیمسه‌یه ظلم ائیلمه‌سن هئچ زمان اؤز اَلیمیزدن‌دی گلَـن هر یامان. کیم سنی یاد ائیله‌سه؛ اولماز دَلـی سن بیَنَن ایش‌لره سینماز اَلـی. یاخشیلیغین گونده دادار لـذّتین چئینه‌مز عمرونده او قارداش اَتین. آی باش اولان، یئرده بوتون باش‌لارا جلوه وئـرن هرنه قلم قاش‌لارا. سن کیمی تای‌سیز گوله بیر بولبولم وار- یوخو عشقین‌ده یانان بیرکولم. شکلیمی تقدیره گؤزل چکمیسن من‌ده گؤزللیک دنه‌سین اَکمیسن. چولغالاییب دیر ایشیغین عالمی سن‌دن آلیب دیر بویاسین هر زمی. قوش‌لارا سن گؤی‌ده قاناد وئرمیسن هر زادا دیل، هر دیله داد وئرمیسن. هرنه گؤرر گؤز ؛ ائشیدر هر قولاق هرنه یازار خلق؛ اوخویار دیل- دوداق. کیم‌دی آزان، یا آرایان بیر دلیل سن گؤزله هئچ بیری گیزلین دئییل. تئز یاپیلار هرنه ایشی ایسته‌سن انگل اولانماز سنه بیر یول کَسن. هرنه یاپیرسان، واری‌دیر حکمتی سن یارادیبسان بیزه هر فرصتی. هئچ دوشه‌بیلمز قلَمین‌دن داری کیمسه‌یه سن وئرمه‌سن، اولماز واری. اذنین اگر اولماسا هئچ بیر کیشی باشلایابیلمز بیلیرم بیر ایشی. سنده گؤزللیک‌دی قیراقسیز دنیز بیر ایشیغین‌دان یارانیب کؤلگه‌میز. باش سنه اَیمکده ؛ یارانمیش‌لارین وارلیغی عشقینده دارانمیش‌لارین. سن بزه‌ییرسن بیزه ساغ- سول‌لاری خلقه قیسالدیرسان اوزون یول‌لاری. سندن آخار عشق آرازی دوب- دورو یاخشیلیغین بوستانی قالماز قورو. عشقین اولوبدور بیزه آیدین نشان جاندا گزر سانکی دامارلاردا قان. عشق‌دن اولموش کؤنولوم، جان‌دا گؤز دویغولاریم سانکی کول آلتین‌دا کؤز. سن منه الله؛ سنه من بیر قولام اولماسا عشقین کی، ده‌یَـرسیز پولام. عشق‌ایله چون بیر یول اولوب یوللاریم چیرمالانیب قوللوق اوچون قوللاریم. سنله اولان عهدیمی سیندیرمارام یازدیغیم ایلغار واراغین جیرمارام. عاشق اولان، شبهه‌نی قاتماز دینه بوینونا قویماز داها شیطان مینه. عشق، اؤزل کؤلگه‌دی سندن ساری وئرمرم اَل‌دن داها سن‌تک یاری. عاشقه بیر یوکدو بو عشق اَردمی اؤیله آغیردیرکی، چکنمز گمی. قیش گونو ده ، پارلاسا عشق اولدوزو سیندیرار عشقین سیجاغی هر بوزو. کیم اَته‌ییندن یاپیشیب، توتماسا تئـز اونو شیطان باساجاق دیر یاسا. گَل توت اَلیم‌دن؛ منی قالدیرگؤیـه قویما دوشَم آلچاغـا ؛ شیطان دؤیـه. سن قورو، شیطان منی آلداتماسین عقلیمی غفلت گؤلونه آتماسین. لطف ائله تقوا ده‌یَـرین آتماییم دینیمی دنیایه ساقین ساتماییم. کیم یؤنه‌لیر شیطانا بئل باغلاییر سن منی اوندان، اونو مندن آییر. دوز یولا هرکس کی، قارانلیق هؤرر کور کپَنک دیر، گونو هاردان گؤرر؟ گَل بو قارانلیق‌لارین عمرون بیتیر ظلمو گؤتور؛ ذلّـتی گؤزدن ایتیر. هؤر گونشین گونده قیزیل تئل‌لرین آل قارا به‌ی‌لرده بورون یئل‌لرین. سن‌سیز اورک‌لرده محبّت سولار غم دیکه‌لر؛ شَنلییی کؤک‌دن یولار. غم باداغین‌دان قیریلیب کیم قاچیب حاجت اَلین، بیر سنه هرگون آچیب. توت منی یارب! قارالیق توتماسین خوش گله‌جک‌دن منی اومسوتماسین. منده اولان عشقی آرین‌دیر داهـا گؤزده دوران بُت‌لاری سین‌دیر داهـا. جان‌دان اومودسوزلوغو قالدیر گینه قویما تویوق‌تک گیره جان، بیر نینه. آت منی پارلاق گونشین قارشینا قوی اوره‌ییم آلسین ایشیق‌دان خینا. عشقی گؤتورسم نه قدر چوخ باها قورخودا‌بیلمز منی شیطان داها. معرفتین وئـر اَبَـدی آلماسین باشقا گؤزل‌لرده گؤزوم قالماسین. قوی گؤتورولسون گؤزومون پرده‌سی شوقا گتیرسین منی بولبول سسی. عشقه مینیب، عالمی جولان ائدیم من جانیمی بیر سنه قربان ائدیم. جان بئله، دنیاده یوووشسون سنه تا ابدیّت‌ده قوووشسون سنه. .