بئـش رباعـی

باخدیم گوله گول باخدی، یاندیردی منی یاخدی سوزگون باخیشین‌دان گول، بیر باغریما اوخ تاخدی وورغون دوشه‌رَک اولدوم، عمروم بویو حیرانی گول گولدو گؤزوم‌دن هئی، چای‌لارکیمی یاش آخدی. ** اود سال بیر آی گول باغریما، عشق‌ایله بیر یاندیر منی عشق آنلامین آندیر منه، آندیر آلوولاندیر منی بیر سئوگی قالسین من‌ده قوی، تا منلییین چیخسین کولو بیر عشقه قربان اولماغا، لطف ائیله‌ییب، قاندیر منی. ** گَل بیرگولومسون سئوگیلیم! قوی من‌ده سینسین غم بوزو قوی پارلاسین بلکم بوتون گؤی‌لرده عشقین اولدوزو گوجلندیر عشقی، کؤنلومون ملکونده قوی من یوکسه‌لیم شیطان دا اومسونسون داها سینسین تکبّـر بوینوزو. ** ساچدین ایشیق سن آی گؤزل، دنیاده یانلیز دوز یولا آنجاق او اوزدن من سنین، عشقینله وئردیم قول- قولا عاشق سئچر دوزگون یولو، دوزگون یولون خوشدور سونو دوز یولـدا گئچمز هئچ زمان، سولدان ساغا، ساغدان سولا. ** قارشین‌دا توم شیطان‌لارین، عشق اولسا چؤکمز دیـزلریم سولماز ساقین باغچامداکی، جاندان بیتَـن نرگیـزلریم یار- یار دئیَر هرگون دیلیم، عشقین‌ده بیتمز نیسگیلیم عشقین یولوندان هئچ زمان، بیتمز، سیلینمز ایـزلریم. .