ایکی یـول

دنیا بیزه ایکی یولون باشی دیر انسانین یوخ، شیطانین یولداشی دیر جان اویدوران، کیپرییی دیر، قاشی دیر یونگول باشلار گؤزون دیکر خالی‌نا دوشونمه‌دن بارماق باسار بالی‌نا. اَلیمدکی یاشیل قلم آنیق دیر دنیاده هر ایکی یولا تانیق دیر شیطانلارین گؤزونده بیر سانیق دیر غم شاهیندان بیلیر شاللاق یئیه‌جک اؤلورسه ده گئرچک‌لردن دئیه‌جک. قارا یول بو ایکی یولدان بیری دیر اوردا بیرجه کؤتولوک‌لر دیری دیر هوس‌لر ده اورَک‌لرین کیری دیر ساپیقلارا هوس سویو سرین‌دیر قارانلیغین قویولاری درین‌دیر. قارا یولون وار دومانی، وار قیشی غم پَپه‌سیندن واری‌دیر آلقیشی آیدینلیغین اؤلمه‌سی دیر قارغیشی یوخدور اوردا سازاقلارین نوختاسی بوغارگئجه، کسَر قیشین شاختاسی. قارا یولون شاهی سورگون شیطان دیر شیطان اوچون قارانلیق‌لار میدان دیر نه یازیق کی، اویموشلاری انسان دیر اوندان اؤترو چوخ‌لارین سودو داشار آنجاق او دا گؤزل‌لره ساتاشار. انسان یازیق، شیطان آزیق قورنازدیر ایلغارینی اؤنَمسه‌مز دانقازدیر آلقیشلاری موتسوزلوغا دامازدیر حلوا وئرر اؤنجه انسان دادانسین قویروق اولسون قارانلیغا قادانسین. بو شیطانین مین بیر دنه اوزو وار دوشونمه کی، ایچینده بیر دوزو وار ! بیر انسانا، شیطانلاردان یوزو وار او ایسته‌ییر ربّـیمیزدن آییرسین قارا یولدا بیزدن شیطان قاییرسین. سو وئر شاعر! دیرچَلسین عشق آغاجی شیطانلارا نه قارداش دئه، نه باجی سن یازارکن بیلدیک نَه‌دیر آماجی کاش یوخودان توم انسانلار آییلسین بیر الله-ا گؤزل بیر قول ساییلسین. هر بیر زمان قارانلیق‌لار وورنوخور تاپسین بلکم شیطانا کسکین اوغور او اوزدن دیر دئیَر آی قوردوم قودور ! هرگون دور گئی سن بیر قویون دریسین قویما خلقین غم بوزلاری اَریسین. قارا یولون بایقوشلاری بانلایار آبادلیغی سئونلری دانلایار قارغا اؤزون قارتال‌لارا یانلایار ایسته‌یَرکی، قارتال‌لاری توولاسین اونلار داغین جئیران‌لارین اوولاسین. قارا یولون دنیاسی وار، کلَک‌دن یوز دون گئیَر هرگون آلاش لَلَک‌دن عبرت آلماز یئردن، گؤیدن، ملَک‌دن آلدانمایین، اوزلوک‌لری بزَک دیر آستارلیغی عنبر دئییل، تزَک دیر. دنیا سانکی بیر گلین دیر، مین اَرلی چوخدور نازی، هر بیر نازی کهَرلی هئچ بیر اَره وئرمز آتین یهَرلی آنجاق سئوَر وورغونلاری قاریخسین آتدان یئره دوشسون، قالیب داریخسین. قارا یولدا هر بیر زادین آدی وار بو آدلارین ایکی گونلوک دادی وار آلداتماغا، شیطانین هر زادی وار هر بیرکسی بیر تور آلیب، قاندیرار اویانلارین، آخرتین یاندیرار. قارا یولدا سولار کؤنول گول‌لری قارغا بوغار باغچادا بولبول‌لری غم سووورار تؤرَتدییی کول‌لری آغلایانین دنیا باخماز یاشی‌نا سویوق سولار قاتار خلقین آشی‌نا. انسانلیغین باشی اوردا یوکسل‌مز دورو بیر سو بولاقلاریندان گل‌مز محبتین گولو ساقین دیرچَل‌مز کیمسه دویماز محبتین قوخوسون بولبول اولماز ، قیزیل‌گول‌دن اوخوسون. آچار دومان آرالیق‌دا اویونون قورد آپارار آیدینلیغین قویونون بوکر چوخلار قارانلیغا بویونون بَللی اولماز آنجاق ائرکَک- دیشیلیک کؤچوب گئدر آرالیقدان کیشیلیک. تمدّونون دورولماییر بولاغی حق سؤزلری ائشیتمه‌ییر قولاغی یوکون چکیر یوخسول‌لارین اولاغی قان آغلاییر، او اوزدن دیر یازیق‌لار کولومسونور حق یولوندان آزیق‌لار. قیرگئجه‌لر یورغان چکر یاتانا آیدینلیغی قارانلیغا ساتانا میدان وئرر هر یئرده شارلاتانا اویار گؤزون افق‌لره باخانین اؤزگورلویون فکرین باشا تاخانین. قارانلیغین شاهی فرصت آرایار خلقین باشین تومارلاییب، دارایار دئیر یانلیز دنیا سیزه یارایار چکر خلقی قارا یولدا دوزاغا آخرتین داشین آتار اوزاغا. ظالم باخار تالادیغی پول‌لارا هئی قیرجانار اَزدییی یوخسول‌لارا رحم ائیله‌مز اؤکسوزلره، دول‌لارا قووارلانار بئش گونلوک سود گؤلونه لعنت اولسون ظلمون آلچاق دؤلونه! سازاق گؤرسه گول‌لردن هر بیری‌سین فرق ائیله‌مز نارینین یا ایری‌سین اؤلدورر تئز اَن چوخ باشی دیری‌سین سونار باشین قارانلیغین شاهی‌نا نظر قیلماز بولبول‌لرین آهی‌نا. آیریلیغین یولون آچار ائل‌لره انسانلیغین کولون وئرر یئل‌لره تاپشیرار اول قاندان آخان سئل‌لره ییخسین گؤزل بیرلیک‌لرین قورغوسون قیرسین داها عشقین اویاق اوردوسون. قیش بوراخار قابانلارین باغلارا شاختا سالار یایلالارا، داغلارا شاللاق آتار سازاق سولا، ساغلارا یامان گونو قویار خلقین اؤنونه سامان تپَر آمانلیغین گؤنونه. قووارلانار دیکَنلرین کول‌لاری دوروب کسر یازا گئدن یول‌لاری یانین‌دا دیر چونکو قیشین قول‌لاری اومسودارکن کؤنلونو یازدان، گولون باغرینا قان داملادار هر بولبولون. اوگونلرکی، قارغا قونار منبره سارساق آلار قیغ، توپورر عنبره اَردمی، ایمانی ساتار قنبره من نه دئییم بیر بئله آلچاقلیغا قارغا وئریر گؤرنئجه لذّت قیغا ! قارا یولدا غم چاناغی قالین دیر آلچاقلیغین ایز یئری‌ده آلین دیر شنلییین اوردا آیاغی یالین دیر بو تور یولا کور یولجولار آدانار تورباسینا ائششَک‌لری دادانار. قارا یولدا باتار عشقین اولدوزو قایغان اولار قار آلتیندا قیش بوزو بوردا اولماز موتلولوغون سونسوزو اوچ گون، بئش گون هوس دوزو یالانار سوچ اوستونه سونوجدا سوچ قالانار. چوخ وار اویان، بو دنیانین خالینا اویانلاری شیطان سالار دالینا آلچاقلیغین ایزین وورار آلینا ایسته‌یَرکی، انسانلیغی سووورسون آدین، یادین، هر بیر زادین قووورسون. دنیا بوگون ظالم‌لره آلاندی یالان‌لاری سارساقلارا پالاندی محبتین ائوی بوردا تالاندی خزان یئلی یاشیل یازی بورویوب بولبول‌لرین عمرو غم‌دن چورویوب. قارا یولون هر بیر یانی دومان دیر اورَک‌لری اوردا سورَن گومان دیر هرکیمسه کی، حق‌دن رحمت اومان دیر گرَک‌دیرکی، قارانلیقدان آیریل‌سین بیر الله-ا اورَکدن سجده قیل‌سین. بو دنیانین چوخدور قابان، آیی‌سی شیطان اولوب گؤر کیم‌لرین دایی‌سی آز، یاخشی‌لار، نه چوخ پیس‌لر سایی‌سی چالیش دوستوم! سن اول بوگون آزلاردان وازگئچ بو دنیا گؤسترن نازلاردان! کؤتولوک‌لر قارا یولدا دوغولار یاخشیلیغین قولاقلاری اوغولار چیرکین سودا هوس‌جیل‌لر بوغولار دنیا باخار بو دوروما سئوینر آنلامازلار نه بیر اینَر، نه دینَر. گوندوز ایله گئجه هر آن ساواشار قیش گئجه‌سی ییرتیجیلار اولاشار داغدان ائنیب، داوارلارا داراشار قویون- قوزو آیری دوشوب، مله‌شر قوردون دیشی قانلارینا بله‌شر. شنلیک‌لری دوغرو غم دیر، بو یولون ایلکین قربانی اَردم دیر بو یولون سون اوجو دا جهنّم دیر بو یولون گئج اولمادان گلین اوندان آیریلاق آیدینلیقدان، بو درده درمان قیلاق. ظالم آتلی، دوزدورکی، من یایانام فرق ائیله‌مز بیر ائرکَک یا بایانام ظلمون گرَک قارشیندا من دایانام یا اؤلدورم یا سیندیرام بئلینی آلام بلکم قارانلیغین یئلینی. آیدین یولدور ایکی یولون باشقاسی بوردان گئچر گؤزل‌لرین داشقاسی یولچوسونون اولماز داها قاشقاسی انسان بوردا حقیقته سارینار قارانلیقدان، یامانلیقدان آرینار. یانیق دنیا بیر کؤپرودور اوجانا عشقین اهلی بوردا گلسه ‌ده جانا اذین وئرمز شیطان اونا قیرجانا اؤنَمسه‌مز بو دنیانین جلوه‌سین حق‌سیز یئمز دَن- دوشونو، بیرکَسین. رحمت اولسون بو دنیانی ساتانا شیطان‌لارا اورَکدن داش آتانا حق یولوندا قیزیل قانا باتانا اوکس کی، بیر الله-ا باش اَیَندی ایکی یولدان، آیدین یولو بَیَندی. آلدانمایین قارا یولون آشی‌نا گؤز دیکمه‌یین بو دنیانین قاشی‌نا گَل دولاناق آیدین یولون باشی‌نا بلکه بیزی ربّـیمیزه گؤتورسون قیامت‌ده چتینلیک‌دن اؤتورسون. آیدین یولدا گونش ساچین یایارکن بوز اَریییب، قایالاردان قایارکن گوندوزو گول قارشیلاییب، سایارکن قیرگئجه‌نین باغری درین چاتلایار قیش دؤنَمین، یاز قوشونو آتلایار. گول گونَشه، گونش گوله دولاشار اورَک‌لردن سئوینجین سویو داشار سئوگی‌لرین سئلی داغلاردان آشار دیکَن سولار، غم بولاشار قانی‌نا بیر اود دوشر قارانلیغین جانی‌نا. گول اوخشایار بولبول‌لرین بویونا بولبول چیخار اؤزگورلویون تویونا قووارلانار آیدینلیغین سویونا غم دیکسینَر بولبول‌لرین سَسین‌دن قالخیب کؤچَر آیدینلیق اؤلکه‌سین‌دن. گونش ساچار آیدین یولون دوزونه قیش گئجه‌سی دؤنَـر یـاز گوندوزونه سحر یئلی اَسَر خلقین اوزونه اؤزگورلویو بولبول‌لره ساغلایار اَزگی‌لرین اورَک‌لره باغلایار. گلین باخاق آی-گونشین سؤزونه بیرکول آتاق قارانلیغین گؤزونه وئردیک‌لرین بیز قایتاراق اؤزونه پیسلیک‌لری اورتالیقدان قالدیراق شیطان‌لارین اوردوسونا سالدیراق. آیدین اورَک، آیدینلیق‌دا سیخیل‌ماز آیدین یولسوز گؤی دامی‌نا چیخیل‌ماز قارانلیغا ساقین گوندوز ییخیل‌ماز سونوجدا گون قارانلیغی کَسه‌جک یاشیل بایراق هر بیر یاندان اَسه‌جک. آیدین یولو دوزگون گئدَن اوسانماز عشقین سویون ایچیب، سوندان قوسانماز ظالم‌لرین ظلمون گؤروب، سوسانماز عدالتی، حقّی غم‌دن سووونار ظلمون اَلین آت‌دان سالیب، اووونار. گونش آلار بولبول‌لری قفس‌دن قارانلیغی سالار آنجاق نفس‌دن بایقوش دوشر بولبول گلنده سَس‌دن قارغالارین کؤتو سَسی کَسیلر گؤزگولرین توزون گؤزل‌لر سیلر. سازاق بوردا میدان اوخویابیل‌مز غم‌دن بیزه کؤینک توخویابیل‌مز گول‌لرکیمی ساقین قوخویابیل‌مز سازاقلارین سازین گونش سیندیرار قیش توخویان ایپ‌لری بیر- بیر قیرار. آیدین یولدا یاغار رحمت یاغمورو کؤنول باغی بو یولدا قالماز قورو بولاقلارین سویو آخار دوب- دورو بو سولاردان ایچَن کؤنول، شاد اولار شاد اورَک‌لرده الله-دان یاد اولار. بیرگؤزله ده‌یسه ده اوخ یاراسی باسابیلمز قیرگئجه‌نین قاراسی اوزاق دوشمز حق‌دن اونون آراسی گؤزللیک‌لر اوزَرینه یانسییار اولای‌لارا حقّ اوسته جاندان قییار. آیدین یولدا بولبولو گول دیندیرر گونش آیی، قیزیل آتا میندیرر آی دا چیخیب، ظلمتی دیکسیندیرر قارانلیق دا آیی گؤروب، سوزولر باغریندا قان دویون دوشوب، دوزولر. پوزار بوردا گونش قیشین اویونون گؤنون سویار قارانلیغین سویونون شاختالارین قیرار یوغون بویونون دویون وارسا، گوندوز قولای چؤزولر آیدین یولدا هر اولایـا دؤزولر. آیدین یول بیر ابدیّت یولودور گؤزللیک ساغ، موتلولوقلار سولودور بوردا انسان حقیقتین قولودور بیر الله-ا بئلین، بویونون اَیَـر بو ایشین‌دن مین اوخ شیطانا ده‌یَـر. شیطان آنجاق سورَکلی قیسقان‌سا دا باغری قانا دؤنوب، جانی یان‌سا دا انسانلارین اوستونلویون دان‌سا دا سینمایاجاق دیر بو تاجین قیراغی سؤنمه‌یه‌جک حقیقتین چیراغی. قارا یولا گؤزل‌لر وئـرمز ده‌یَـر قارانلیغا، ایشیق سانکی اوخ ده‌یَـر اَردملی انسان قارا یولدان اَیَـر آیدین یولا دوغرو گئدیب، یوکسه‌لـر چتینلیک‌لر عشقینه اویغون گلـر. گؤزل‌لره، گؤزل‌لر یولداش اولار عشقین سویو گؤزلرین‌ده یاش اولار انسانلیق‌دا، عاشق انسان باش اولار عاشق اولان، قارانلیغا یول آچماز آلان‌لاردان چتین دوروم‌دا قاچماز. گؤزل باش‌لار، گئدر عشقین داری‌نا گؤزل‌لرین گلمز اؤلوم عاری‌نا عاشق سئور باشین وئرسین یاری‌نا جانی عشقین قیلینجی‌نا ، قین اولسون آیدین یول‌دا، گؤزلری آیدین اولسون. لطف ائیله بیر حقّـیمیزده آی الله! جانیمیزا عشقین سویون یای الله! گؤندر بوتون ایشیق‌لاردان پای الله! بیزی ساغلام گئچیرت آغیر سیناق‌دان قورتار ایکی آجون‌دا دا، قیناق‌دان. اوجا ربّیـم! یاردیم ائیله بیزلره آرتیق گوج وئـر آیدین یولدا دیزلره فرصت وئرمه شیطان کیمی هیزلره قویما بیزی قارا یولا گؤتورسون کؤنلوموزو غم یوردونا اؤتورسون. گؤزل ربّـیم! من بیر سنین قولونام یانلیز سنین، هر یئرده یوخسولونام آرزوم بودور رحمتین‌ده بولونام کرَم قیل قوی شعریم گؤزل سؤز اولسون قارانلیغین خرمنین‌ده کؤز اولسون. آی کؤنولوم بو دنیادان سیلکه‌لَـن دور فله‌یین قلبیرین‌دن گئچ، اَلَـن دنیاجیلین دنیادیر باغرین دلَـن دوشونمه چوخ بو دنیانین وارینا ایمان ساتیب، اؤدول وئـرمه قارینا تویوق کیمی گیرمه غفلت نیـنینه اؤنَم وئـرمه قارا یولون جیـنینه دوز یول ده‌یَـر اَیری یولون میـنینه دوغرودورکی، دوز یول گئدن یورولماز حقّـین یولو، ساپیق‌لاردان سورولماز. بو دنیانین باشین‌دا بوینـوز اولما بوغچاسین‌دا چؤرَک اولما، دوز اولما قار آلتین‌دا هئچ بیر زمان بـوز اولما آییق یاشا، اؤزگور یاشا، دوز یاشـا عمرونو گَل آیدین یول‌دا وور باشـا جانیم اولسون قربان گؤزل الله-ا بورجوم چوخدور منیم بو تای‌سیز شاهـا عاشق‌لرین آلار جانین چوخ باهـا بیر سیناق دیر آیدین یولون بلاسـی عاشق‌لرین بؤیوک‌دور کربلاسـی. سؤز بیتمه‌دن، شعریم چاتدی سونـونا آلدانمادی بو دنیانین دونـونا سؤز وار ده‌یَـر چوخ سؤزلرین اونـونا دئیَن، سؤزو بَـزه‌مه‌سه اؤزوندن گلیرسه بیر حقیقتین گؤزوندن. « اِلیـار» آچدی قارا یولون آغینی گؤستردی ده آیدین یولون داغینی دادیزدیردی تورکو دیلین یاغینی سئچسین هرکس هانسی یولو سئچه‌جک بیلسین داها سیناق‌لاردان گئچه‌جک. .