اَردَملـی کیشی

اردملی کیشی شیطانا یولداش اولابیلمز یولداش یولونون اوستونه بیر داش اولابیلمر. یاردیمجی اولار الله اوچون، خلق آراسیندا کسمز یولونو کیمسه‌نین اووباش اولابیلمز اَیمز باشی دنیاده ساقین، تولکویه، قوردا شیطان اوتوران محفیله فرّاش اولابیلمز گؤزدن قیراغا قویماز او انسانلیغی جاندا یولسوز یاشایان گؤزلر اوچون قاش اولابیلمز انسانلارا ظلم ائیله‌مز آرتیق بو جهاندا انسانی، اویوشدورماغا خاشخاش اولابیلمز جاندان یانار آرتیق یازیق انسانلارا هرگون نعمت گؤلونه دوشسه ده عیّاش اولابیلمز حق اوردوسونون عسکری دیر اؤلکه ده آنجاق هئچ یئرده بوجور دوغرو قیزیلباش اولابیلمز آنجاق کی، یاراشماز اونا، دنیایه اَییلمک لازمدی بوجور اینجی‌لرین قدرینی بیلمک! اردملی کیشی غم پاییزین خلقه یاز ائیلر دؤش‌لرده غمین گؤل‌لرین آرتیق دایاز ائیلر هر سفره ده هر نعمتی پای- پوشک ائله‌یَنده خلقین پایین آرتیق، اؤزونونکون ده آز ائیلر دنیاده قضادن تؤره‌نَن هر اولای اولسا عبرت گؤزونون قارشی‌نا هرگون قوتاز ائیلر الله-ی بیَندیرمک اوچون هر ایشی یاپسا اخلاصی بو ایش‌لرده گؤررسن داماز ائیلر هر باغچادا بولبول گوله، گول بولبوله گولسه عشقین سؤزونو، گؤر نئجه باغریندا ساز ائیلر هئچ کیمسه‌نین آنجاق بو گؤزل، دردینه گولمز گؤز یاشلارینی بلکه یانارکن آراز ائیلر محمود، بیلیر احمدی اسلام اوجاغیندا محموده، یاشارکن اؤزونو بیر ایاز ائیلر آنجاق کی، یاراشماز اونا، دنیایه اَییلمک لازمدی بوجور اینجی‌لرین قدرینی بیلمک! اردملی کیشی اؤز یوکونو اؤزگه‌یه چاتماز شیطانی قویوب، دوغرو مسلمانه داش آتماز دینین، شرفین، نازلی گولون، سئوگیلی یارین عشقین، وطنین، بیر ده دیلین دوشمنه ساتماز قیی‌ماز آجیلیقدان پای اولا دوستونا، قیی‌ماز یاتمیش ایلانی اویخودان آنجاق‌دا اویاتماز آنجاق کی، کدر، بیر ده قودورغان هوسین‌دن عشق‌ایله دامارلاردا آخان قانینا قاتماز ذلّت گئچی‌سین، بایداسینا باش گئده، ساغماز هئچ قدرته، یالتاقلیغا اصلا دیلی یاتماز بال بارداغینی، قویسا اونون قارشینا شیطان دیمدیک بله‌مز، بارماغی اصلا بالا باتماز رحمت قازانار کندینه، « اِلیـار»! بئله انسان رحمت قازانابیلمه‌سه هرکیم، یارا چاتماز آنجاق کی، یاراشماز اونا، دنیایه اَییلمک لازمدی بوجور اینجی‌لرین قدرینی بیلمک. .