آرامیـزدا

شیطانیمیز وار، باشی انسان باشی چوخدور اونون چئوره ده جان یولداشی هئی بزه‌نیر، هئی دوزه‌نیر، ایسته‌ییر قاشلارینی ائیله‌یه سلطان قاشی چوخ سئوینیر غمده سولان گول‌لره اوزده آخیر گؤزلرینین قان یاشی دین زمیسین‌دن گؤتورور بوغداسین هم‌ده ائدیر خلقی ده‌ییرمان داشی نَننی‌یه یون، کَندی‌یه اون دولدورور قایناماییر ملّتـه احسان آشی ایندی بو شیطان دئییر انسان منم! اؤلکه ده اَن دوغرو مسلمان منم! اوزده گولور، آرخادا قول باغلاییر باشی کسیر هم اوتوروب آغلاییر لیلی‌نی، مجنونو گؤررکَن اؤیور هر بیرینین آیریلیغین ساغلاییر گوجلو قولا، مین کره یالتاقلانیر یوخسولون آیقین اوره‌یین داغلاییر ایستمه‌ییر غم بیته، گؤزدن ایته هانسی اورَک‌لرده کی، غم چاغلاییر قیش گونو، بولبول‌لره گولدن دئییر یازدا گؤرورسن گولو آلچاغلاییر آلدادیر او ، خلقی قویون‌تک ساغیر هم قارا قوردون سیبیلین یاغلاییر ایندی بو شیطان دئییر انسان منم! اؤلکه‌ده اَن دوغرو مسلمان منم! آینادا آنجاق کی، اؤزون خان بیلیر کؤلگه‌ده هرکَنده سلیمان بیلیر چای‌دا بالیق، چؤمچه‌ده سو، چؤل‌ده قاز چرچی‌یه ساققیز، قیزا اوغلان بیلیر شاختانی بیر یاندا چکیر ائولره اودسوز، اودونسوزلارا یورغان بیلیر هر دولا، هر یوخسولا دونقولدانیر یئل قووانا، گؤر نئجه توفان بیلیر وارلی‌یا قویروق بولاییر، توولاییر تولکولره کَندینی آسلان بیلیر هاردا سوموک وار اورادا سومسونور بیر ده کی، سیرتیقلیغی قالخان بیلیر ایندی بو شیطان دئییر انسان منم! اؤلکه ده اَن دوغرو مسلمان منم! قورخوسو یوخ‌دور یاراداندان، بو خان بیر اوزونه یوز جوره ساققال تاخان مئیخانادان مسجده، بوندان اونا گاه کیشی جلدین‌ده گلیر، گاه بایان هاردا گرَک بیلسه، گئییر بیر چاریق هاردا دا لازمدی، گئییر دیک‌دابان سجده ده اَن چوخ اونودور الله-ی بوغداسینا اوردا قاتیر سار- سامان حقّـه اورَکدن یؤنه‌له بیلمه‌ییر باش قوجا دنیایه اَییر هر زمان من بونا شیطان دئییم، انسان دئییم؟ یاکی، دئییم بیر قارا بوینوز قابان؟ ایندی بو شیطان دئییر انسان منم! اؤلکه ده اَن دوغرو مسلمان منم! ظالمی منبرده چکیر هئی دارا آغزین اَییر باغلادیغی ایلغارا خان چوبانا گونده سارای‌دان دئییر قصدی بودور، باغرینا وورسون یارا اوزده تویوق قارشینا چوخ دَن سَپیر دالدا نینین گؤستریر اول سووسارا هاردا اولور یولچویا یول گؤسترن آزدیریر آنجاق کی، باتیرسین قارا یارغیدا هر سوچلویا آغ دون بیچیر چوخ چالیشیر سوچسوزا یاخسین قارا چون قلمیم شعره سریر نیّـتین بوینوزونو یان توتور او « اِلیـار»-ا ایندی بو شیطان دئییر انسان منم! اؤلکه ده اَن دوغرو مسلمان منم! .