تورکمانچاییـم! ( تورکمانچایین فرماندارلیق خیالی)

آی اوجا بوی شانلی گؤزل! تورکمانچاییم! نغمه‌نی قوش، چال سازینی، قوی بیر اویناییم. قامتینه، شانلی قبا گئی، دوروم باخیم بیر دلی تک بلکه جوشا، نئی‌ده نای- ناییم. یولدادی فرمانداریمیز، چیخدی سس- سوراق حق‌ده نظر قیلدی داها، گَلدی ائل پاییم. سکسَن ایلین غم توزونو، سیلدی گؤز یاشیم مژده گلیب، قوی گولوشون من دوروب یاییم. سویدو چوروک کؤینه‌یینی شهریمیز بوگون آرخاداشیم! سؤیله اورَکدن منیم تاییم. چوخ شکر الله! سنه بو لطفدن ساری یاندی بوگون غم دیکَنی ، بیتدی آخ- واییم. قاتدی گونش شادلیغینی ائل سئوینجینه چونکو بوگون کار قولاغا چاتدی ائل هاییم. کؤچدو سازاق، دوشدو اوزاق قیش دومانلیغی بیل کی، داها پارلایاجاق اولدوزوم، آییم. ایندی کدر قورغوسونو سئل‌ده بوغماغا واردی قوزئیدن گونئیه بیر آخار چاییم. بیر ده آلانماز داها باج، مندن اؤزگـه‌لر چونکو امید اولدو منیم گوجلو خان داییم. ائل- اوبانین دردی نه سیخمیشدی « اِلیـار»ی! قوی ائلیمین هرگئجه بخت اولدوزون ساییم! .