تورکمانچایین هارایـی

شوق وار، شهرداریم شهریمی آباد ائله‌سین کوچه‌نین، چای- بولاغین، بیرجه اوزون شاد ائله‌سین. شهرلیکدن یوخودور بیرجه مگر سس- سمیری آز قالیب خانباجی‌لار کوللویو ایجاد ائله‌سین. قهرمان خان بیزه بیر شهره‌لی آددیر، نه دئییم یوخدو بیرکس اونا تای ایندی اؤزون آد ائله‌سین. درده ملّت وکیلی دیل‌ده دئییر چاره منم دوغرودان ایستمه‌ییر بیزلره امداد ائله‌سین. چوخدو، چوخ، وعده وئرَن، سؤیله عمل‌دن نه خبر؟ یوخدو بیرکس کی، اورَکدن بیزه بیر زاد ائله‌سین. دولتین واردیر آبادلیق آدینا قیزلاری چوخ سؤیله‌یین بوزقوشو دا بیر قیزا داماد ائله‌سین. کیشیلیک دالدالانیر یالتاق اَلین‌دن بو زمان قویما یارب! کی، فلک یالتاغی جلاد ائله‌سین! تورکمانچای آنامیزدیر، جانیمیزدان دا عزیز آنانین دردی گرَکدیر بیزی نقّـاد ائله‌سین. بخشدارلیق پالازی یئتمیش ایلین کهنه‌سی دیر بیچیلیب قامتینه، دادینه کیم داد ائله‌سین؟ قوجادیر قلبی جوان، بیر ده‌ییشین کؤینه‌یینی اونا قیمازدی فلک بیر بئله بیداد ائله‌سین. اونلا توم بخش اولان شهرلر استان بزه‌نیب تورکمانچای دا باخیر، کیم دیر اونو یاد ائله‌سین؟ کلیدی-کونده‌نی دولت! داها فرماندارا وئـر قوی بولودلارکیمی گَلسین او دا گورشاد ائله‌سین. یوکو تاریخ یوکودور، چوخ بوغولوبدور نفسی بو بوغولموش نفسی کیم گلیر آزاد ائله‌سین؟ تورکمانچای، گؤزو تاریخ بویو یول گؤزله‌یَرَک هئی سورور کیم گله‌جک بهمنی خرداد ائله‌سین؟ سسلَن « اِلیـار»! بو سؤزو سن ده دماونده طرف یئری وار تورکمانین مردومو فریاد ائله‌سین. .