نیـرین اولدوزو ( رحمتلیک « نیـر »لی علی سیرتی‌یه)

سن یاراتدین « نیر»ده بیرلیک، بیر ده همّت، سیرتی! عشقدن خیر ایش‌لره آلدین بصیرت، سیرتی! سن نیرین بخت اولدوزویدون، پارلاییردین هر زمان بوغچاسین سندن ساری، بوغموشدو ظلمت، سیرتی! بیرگؤزل دیلمانج‌ایدین انسانلیغین معناسی‌نا یاخشیلیق ائتمک سنه اولموشدو سیرت، سیرتی! سن بوکردین قوی ساواش بیتسین دئیه، غم سفره‌سین ائیله‌یَردین صلح اوچون جاندان عنایت، سیرتی! اؤرنَک اولدون سایغی گؤسترمکده آذربایجانا سن نه چوخ ائتدین اورَکدن خلقه خدمت، سیرتی! چوخ قولای‌دیر وارلی‌یا دستک وئریب، آلقیشلاماق سن یازیق یوخسول‌لاری ائتدین حمایت، سیرتی! سن علی اولادینین عشقینده چوخ سوردون حیات اونلارا گؤستردین آرتیق دوغرو حرمت، سیرتی! چوخ گؤزل کی، آد، آتان مختار سنه قویموش « علی» چون علی مولایه گؤستردین محبّت، سیرتی! هر اورَکده سندن آرتیق، بیرگؤزل تصویر وار چیخماییر آنجاق خیالین‌دان او صورت، سیرتی! بیرگول اَکدین سولمایان، دوستوم! کؤنول کویوندا سن یادگار اولموش بیزه، سن‌دن شرافت، سیرتی! الله-ا بیر دوغرو قول اولدون، او اوزدن رَبّیمیز هرگؤزللیک‌دن سنه وئرمیشدی زینت، سیرتی! هم اوغول هم قیزلارین جاندان سئویرمیش‌لر سنی هم ده گؤردوم نیرده چوخ سندن رضایت، سیرتی! سن بیزی تَرک ائیله‌ییب، اولدون خیالین گؤی قوشو ایندی سنسیز چکمه‌ییر غم بیر خجالت، سیرتی! چوخ گؤزل بیرگونده اؤلدون، بیلمه‌دیم حکمت نه‌دیر چون رسول الله اوگون ائتمیشدی رحلت، سیرتی! سؤیله‌ییر « اِلیـار»، نه چوخ دنیاده ائتدین یاخشیلیق ائیله‌سین الله سنه عقباده رحمت، سیرتی! .