کورونا

قارا بیر قورخو سالیر عالمه هرگون کورونا سالیر او هرکسی قارشیندا گؤرورکن تورونا. یاییب اوردوسونو دنیایه اولوب غم‌لره خان نه یاماندیر، نه یاماندیر، نه یاماندیر بو خوخان! بئله ویروسو سالیبلار بشریّت جانی‌نا بله‌ییب‌لر اَلینی گؤر نئجه خلقین قانی‌نا. قورخودان، هرگؤره‌نین گؤزلری قالخیر باشینا گؤرمه‌یَنلر دولانیر دَن- دؤش آپارسین آشینا. خطری دوغرو بیلَن، بیرجه قالیب جان هایی‌نا گووه‌نه بیلمه‌ییر اؤز آروادی تؤکموش چایی‌نا. هره اؤز جان جوالین ایندی باسیر بیر بوجاغا عزیزین، جان- جییارین بیر آلابیلمیر قوجاغا. هامی‌دا، اَل‌لر آیاق‌دان، آیاق اَل‌دن چکینیر نه قونوشماق، نه دانیشماق، نه یئمک جانه سینیر. بو دا بیر تورلو ساواش‌دیر گتیریب‌لر قاباغا اَل‌بیر اولماق گرَکیر ایندی، نه ییغماق تاباغا. بوگون ائولرده اوتورماقدی بو دردین علاجی سیندیرَک حق سؤزو گَل، هرنه قدَر اولسا آجی. سؤزلری بیر ائدک امّا جانی- جان‌دان آرالی اولماسین جانلاریمیز بلکه بو غم‌دن یارالی. دولته بَللی گؤرَودیر کی، اَل آتسین زورونا ملّتین ساغلیغی بلکم بو خطردن قورونا. هر او قالتاق کی، یامان گونده ده فرصت آراییر یاراماز آرزولارین هرگئجه زلفون داراییر. دویسون آرتیق دئییرم بلکه دوشونسون سونونا دوزمه‌سین شیطان اَکن گول‌لری بیر- بیر دونونا. یئتَر « اِلیـار»! بو قدر ائتدین اشارت بیله‌نه رحمت اولسون دئه بوگون، گؤز یاشین ائل‌دن سیله‌نه! .