آی آذربایجان!

آدین دیر تورکه بیر قالخان، ازل‌دن آی آذربایجان! اولورسا منده مین بیر جان، سنه مین بیر جانیم قربان! بیلیر دوشمن‌لره هریان، باش اَیمز سن دوغان اوغلان آنام‌سان هر باخیش سندن، منیم کؤنلوم‌ده نـاز اولدو خیالیم سن سئون گؤیده، اوچارکَن گؤرنه قـاز اولدو ! یاراندین شانلی داغلاردان؛ سوزر عشقین بولاقلاردان کؤنول، عشقین وئرن درسی، آسار هرگون قولاقلاردان بوکولمز شانلی بوی سنده؛ گئچیبسن چوخ سیناقلاردان دئییم سن پارلایان گوندن، قارانلیق‌لار دایـاز اولدو سنین تک شانلی محموده، منیم کؤنلوم ایـاز اولدو . بو یئر بیر حلقه‌دیر سن قاش، بو دنیا سنسیز اولمازدی توکنسه‌یدی سنین دردین؛ اوغوللار بیر ده سولمازدی سئوینجین سونبولون مندن، آغیر غم گونده یولمازدی یاریمدان آیریلان گوندن، دونومدان غم قوتـاز اولدو دؤشومدن داشلانان یاشلار، آخیب گؤزدن آراز اولدو. آذربایجان بو دنیاده، سالار جنّت باغین یاده دؤشوندن هرگون اولاده، ایچیردر عشقدن باده دادان عشقین دادین اَن چوخ، آذربایجان‌دی دنیاده وطن بیر کعبه دیر عشقی، یار عشقیندن آغاز اولدو اودورکی، خسته کؤنلوم‌ده، آذربایجان حجاز اولدو. وطن عشقین‌ده آی « اِلیـار»! آشارسان چنلی بئل‌لردن یولارسان آیریلیق دردین، آلارسان یاردیم ائل‌لردن هارای تاریخه یوکسلدیب، یازارسان قانلی تئل‌لردن کؤچر قانجیل قارانلیقلار، باخارسان قیش دا یـاز اولدو گؤررسن یازدیغین سؤزلر، اوزان باغرین‌دا سـاز اولدو. .