گَل مهـدی(ع)!

یئر اوزونو توتوبدور گَل، قاپ- قارا بیر دومان مهدی! گونلریمیز گلیر آرتیق هر بیری چوخ یامان، مهدی! ظلمت آشیب سینیرلاردان، شاختا چکیب حصار قاردان چولغالاییبدی دنیانین، یارن- یؤره‌سین یالان مهدی! گونده آخیر قیزیل قانلار، توتساق اولوبدور آسلانلار تولکولر ایندی میدان‌دا، اولدولار ارسلان، مهدی! گؤرنه آغیر گئچیر گون‌لر، یالقیز اولوبدو دوزگون‌لر خلقه یالان تمدّن‌لر، قویدو گؤزل پالان، مهدی! قیرگئجه‌نین قودوز قوردو، خان چوبانا کلَک ووردو آلدی اَله چوماق اولدو، هر قویونا چوبان، مهدی! شیخ اونودوبدو یاسینی، دَن آغاجی ائدیب دینی خیری یئتیشمه‌ییر خلقه، دینه اولوب چیبان، مهدی! ایندی یاشیل گئیَن چوخدور، یاغلی سؤزو دئیَن چوخدور سوندا نماز قیلان چوخ آز، چوخدو وئرَن اذان، مهدی! ظلم اودونا یانیر عالم، اود قاپیر، اودلانیر عالم گئج گله‌سن اگر بیرگون، کول اولاجاق جهان، مهدی! غم سئلی گَل آشیب قاف‌دان، یوخدو خبر بیر انصاف‌دان سئوگی‌یه‌ده بوگونلر غم، وئرمه‌دی بیر امان، مهدی! غم قالانیب اورک‌لرده ؛ سئوگی قالیب کولک‌لرده زنجیر اولوب آیاق‌لاردا ، قیرمیزی بیر ایلان مهدی! جهل آتینا مینیب دنیا، هرگؤزله دینیب دنیا کیمسه‌یه گول عدالت‌دن، ائتمه‌ییب ارمغان، مهدی! قاش‌لارا هئی باخیر داغلار، یول‌لارا گؤز تاخیر چاغلار گَل سنین ایسته‌ییر صاحب چیخماغینی زمان، مهدی! قیشدی ؛ سازاق جومور جاندا، گؤز یومولوردا انساندا ایندی حیات اولوب سن‌دن، قورتولوشو اومان، مهدی! ایسته‌ییرم من الله‌دان، بیر بئله درده بیر درمان بیر ده سنی بو عالم‌ده، گؤندره خلقه جان، مهدی! گَل گؤزلیم، گؤزل مهدی! دفتریمه غزل مهدی! دویغوما جان وئـر عشقینده، « اِلیـار»ی قیل اوزان، مهدی! .