90

اؤلـوم

من دوغولاندان آی اؤلوم! سن منه یولداش اولموسان گاه گؤز اولوب حیاتیما؛ گاه گؤزومه یاش اولموسان. قورخولودور آدین سنین؛ عشقی یالان اولانلارا باشقا حیاته سئوگی‌سی بیرگوله تای سولانلارا. آخشامی‌سنسن عمرومون؛ سنده منیم گونوم باتار بیر ابدی حیاته سن گلسن اگر اَلیم چاتار. بیلمه‌ییرم ساغیم‌داسان؛ آرخادا یا سولوم‌داسان دامدا- دوواردا یا منیم قارشیداکی یولوم‌داسان؟ گَل قوشا بیر قاناد گتیر؛ سن منی یئردن آل‌ماغا چون ملَکوته باغلی‌یام، یوخ کی، بو یئرده قال‌ماغا. گؤزله‌ییرم اؤلوم! سنی؛ عمرو باشا سورم گئدم سن منی اؤلدورن زمان، من سنی اؤلدورم گئدم. بولبوله تای اوچان قوشام؛ توتساق اولوب جهان منه بیرگولون عشقی دیرکی بو یئرده وئریبدی جان منه. گَل بو قفسدن آل منی؛ قالمادی جان‌دا چوخ دؤزوم اؤز گولومه قوووشماغا باشقا جهان‌دادیرگؤزوم. اؤلمک اؤزو دوغومدو بیر باشقا جهانه آی کؤنول! سن داها من اؤلَن گونو ، گلمه فغانه آی کؤنول! قورتولاجاقدی اوردا کیم بوردا باش اَیسه الله-ا عشق‌ایله چیرپینانلارین، الله آلار جانین باهـا. دوزدو سنی قضا چکیب، بیر قیریشیقلی عالمه قالدیراجاق اؤلوم سنی بوردان ایشیقلی عالمه. یاخشی بودور جهاندا سن گوج وئره‌سن باریشماغا دارگئجه‌نی داریخدیریب، گوندوز‌ایله قاریشماغا. یاخشیلیق ائیله بوردا چوخ، عمرو یئتیرمه‌میش باشا آتدیغین اوخ سعادته، ده‌یمه‌یه بلکه بیر داشا. هاردا ائدنده یاخشیلیق؛ الله-ی اوردا یاد ائلـه الله-ا چون دایانماسان؛ شیطان آلیب، وئرر یئلـه. پرده‌نی ییرتاجاق اؤلوم؛ جانلاری قیرتاجاق اؤلوم شیطانا چوخ اویان گؤزو ، بیرگئجه چیرتاجاق اؤلوم. هرنه جهاندا جانلی وار؛ بیل؛ داداجاق اؤلوم دادین خوش حالینا اونون کی، بیر الله-ا وئردی هر زادین هرنه شکیل‌ده وار اؤلوم، گؤزگودور عبرت آلماغا عشق‌ایله جانی دولدوروب، قیرگئجه‌دن بوشالماغا. الله ! آماندی رحم ائله من سنه سوچلو بیر قولام رحم ائله اؤلمه‌دن قاباق؛ قوی ایچیم عشقدن مُدام. .