یـاردان اوزاق

غم منه بیر قنیم دیر ، یاردان اوزاق دوشندن چاپدی منی تالاندیم، هرنه وار آلدی مندن. بوردا من‌ایله بیرجه ، خاطره‌لردی یاردان بیر ده سینیق کؤنول کی، اوزمه‌ییب اَل وطندن. هجرده من قوجالدیم، غمده سولوب سارالدیم گونده من عطرین آلدیم، سئوگیلیمین خُتندن. گونده آیاق یالین من عشق اَته‌یین دولاندیم داملاییر آل‌قانیم بو چؤلده‌کی هر دیکَندن. قیش بوداغیندا سوسموش بولبوله تای منم، من غم دیکَنی جانیم‌دا، چوخ آجیدیر گوَندن. گَل گؤزلیم! دومانلیق ، یول اوزونون توتوبدور آل منی بیر ده قورتار، بوردا بو غملی چَندن. گَل یئره بیر نفس وئـر، غم کوله‌یی توکنسین مژده گتیرسین آغ یئل، بولبوله یاسمندن. قیش کله‌یی داغیلسین، یاز یوخودان آییلسین گول پایینی یئتیرسین، بولبوله هر چیمندن. سینه‌می طور ائدرکن، کؤنلومه قیل تجلّی بایغین اولارکؤنول هر جلوه‌نی گؤرسه سندن. عشق اودونو اؤلوم ده سؤندوره بیلمز « اِلیـار»! آچ اوزانین مزارین، توستو چیخار کفندن. .