حکم ائیلـه!

حکم ائیله، طبیعت گولو بوستانه گتیرسین داغ- داش اَته‌یین سونبوله، ریحانه گتیرسین. گول شوقونا بولبول اوخوسون باغدا، چیمنده یئل، نغمه لرین هرکسه، هریانه گتیرسین. قیرسین قیشی یاز، شاختانی قووسون وطنیمدن اؤزگورلویو داغلارداکی جئیرانه گتیرسین. سن دوز گولوشون اینجی‌لرین گول دوداغیندا قوی شادلیغی گوللر ده هر انسانه گتیرسین. جانلاردا محبت سویونو یای او قدرکی، قارتال دا محبت پایی دووشانه گتیرسین. بیر آرزودو بو کؤنلومو یارب! سنین عشقین آلسین او سنین تک اوجا سلطانه گتیرسین. عشق اولدوزو باغریمدا قارانلیقلاری یارسین اوردان قارا اوز، قیرمیزی شیطانه گتیرسین. اول آیری دوشن داملا منم ، جان دنیزیندن تاپشیر منی سئللر یئنه عمّانه گتیرسین. جان منده سبا شهریدی، سن عشقینی گؤندر بلقیس‌ایله تختین، دئه سلیمانه گتیرسین. جان دویماسا یار جلوه‌سین، عشق اورتایا گلمز عشق اولسا یئتر هرکسی ایمانه گتیرسین. یار عشقی ده‌ییرمان کیمی دیر، بیزده وفا، دَن اوزان، گرَکیر دَن بو ده‌ییرمانه گتیرسین. قوی سنده خیالیم او گؤزللیک‌لره چاتسین « اِلیـار» دا گؤزللیک‌لری دیوانه گتیرسین. .