چالمالی خانـلار

چالمالی خان گؤستریر اوز، اوزده یارکیمی دالدادا شیطان قولودور بیر داغارکیمی. آستاری چیرکیندی، ایراق، دوغرو اؤنجو دن اَللری پامبیقدی، اوزو، آغدی قارکیمی. هرگون آلیر خلقین اَلیندن قارین پایین اینجیدیر اول اَللری‌ده بیر قابارکیمی. اَل یئرینه گونده یاراقلاندیریر دیلین یاغلی دیل‌ایله تالاییر، اوغرولارکیمی. بیر تورآتان‌تک تور آتیر دوغرو یوللارا خلقی سویور، باغرین اویور اَلده نارکیمی. باشه گئییر هرگئجه شیطان دبیلقه‌سین دینی ائدیر چئوره‌سینه بیر حصارکیمی. چوخ چالیشیر قاپساسین انسان دوشونجه‌سین آنلاییشین قارشینا اولسون دووارکیمی. چوخلو سئویر چالمالی خانلار کی، هرکسین نوختاسین آلسینلار اَله اختیارکیمی. هرنه قدر اؤلکه‌نی ظلمت کیریخدیریر سایلارینا آرتیریر اونلار دوغارکیمی. دوشمه‌دن ائششکدن عجب! میندیلر آتا شاللاق آتیرلارکی، قودورغون چاپارکیمی. گؤرکی، هوسدن نئجه بایغین دوشوبدولر قرآنا تفسیر دئییرلر، خمارکیمی. مسجد اگر عشق ائوی دیر، هم‌ده دین باغی سؤیله نه‌دَن ائیله‌دیلر بیر مزارکیمی؟ کیم بیزی تاپشیردی بو سیرتیق چوبانلارا خلقی ساغیرلار سحر- آخشام داوارکیمی. چوخ گرَکیر، بیر بئله تزویری قیرماغا گلسین علی، اَلده قیلینج، ذوالفقارکیمی! حق سؤزه قالخان ائدیب « اِلیـار»، جانین بوگون چیرپینیر اول، قان داشییان بیر دامارکیمی. .