باش سئوگیلـی

هرمُلکه آیاق قویدو، جان دوردو تماشایه یئر-گؤیده بوتون وارلیق، باش اَیدی او پاشایه. بوستانه بزَک وئرمیش، هرجلوه‌سی مین گولدن هرگول پای آلار اوندان، بولبول کیمی شیدایه. گون تک داها آیدین دیر، یار جلوه‌سی بوستاندا بولبول نئجه دیل قاتسین، هر جلوه ده حاشایه؟ عشقینده سنین یارب! باشدان- باشا جان گؤزدور سینم سنه سینادیر؛ گَل بوردا تجلایه. دنیایه توتولدوم من؛ آرزوم، دیله‌ییم سنسن کؤنلوم گلیب آردینجا ؛ قالدیر اونو سینایه. بیر غمزه یئتر سندن، بایغین دوشم اوندان من گؤستر بیر اؤزل جلوه، بنزت منی موسایه. یاد ائیله‌ییرم هرگون، دنیاده « اَلَست» عهدین عشقین منی بیر باخ گؤر، سالمیش نئجه غوغایه. هر عاشقه مهلت وئـر؛ عشقین سنه گؤسترسین قربان ائله‌سین مین جان، بیر سن کیمی مولایه. مولاسینی هر یئرده، عشق اولسا دویار هرکس هم مسجده اوز قویسا، هم باخسا کلیسایه. عشق اولماسا جنت ده ، بیر باشقا جهنم دیر هجرین زَهَرین ساتماز؛ اوزان بئله مأوایه. هجراندا قوجالدیم من؛ رحم ائیله گؤزل! قویما شیطان منی اومدورسون، سون گونده بو دنیایه. چوخ بنزه‌دی رؤیایه؛ عمروم داها دنیاده تعبیری دئه گؤندرسین، یوسف بئله رؤیایه. باش سئوگیلیسن آنجاق، سن هر ایکی عالم‌ده « اِلیـار»، سنه مجنوندور؛ مجنون نئجه لیلایه. .