دیلَک

توت اَلیمدن سن آی الله! منی اَلدن توتان ائیله ایکی عالم‌ده ده اؤز عشقینی سینمده جان ائیله. قوی گؤزل دویغولاریم غنچه‌یه تای بیر- بیر اویانسین بولبولون نغمه‌لرین هر سحر- آخشام اذان ائیله. بولبولون سئوگیسی سندندی، گولون گؤرکمی سندن منی ده بولبوله تای هرگوله وورغون اوزان ائیله. جانی بوستان ائله‌سن کؤنلومو سئوگییله قوووشدور چالاغان نیسگیلی سال غربته، نقشین یالان ائیله. قوزولار تک دؤشومه سئوگی، سئوینجیم یاییلاندا بئله سایغین سورویه کؤنلومو چیلغین چوبان ائیله. یاخشیلیق شوقو قوزئی اولدوزو تک کؤنلومه ساچسین کس یامانلیق یولونو، گونلرین آرتیق یامان ائیله. بیر اورَک وئر جانیما قوی کیشیلیک شربتین ایچسین بو اؤزل اَردمی یالتاقلیغا یایغین چیبان ائیله. یازی گؤندر، بوزو سیندیرسین، آچیلسین یئنه گوللر بولبولون بختین اویات، سن قیشین عمرون تالان ائیله. اَک محبت دنه‌سین دؤشلره قوی گول، گوله گولسون شیطانین باغرینی بوندان ساری دنیاده قان ائیله. موتلولوقلار گلین اولسون، هره‌سی بیر ائوه قسمت قارا گون بیر ده گلنده یولون آزدیر، دومان ائیله. بیرگؤیرچین کیمی گولمک سسی قوی هر داما قونسون بیر ده دنیا غمینه اویماغی بو خلقه مان ائیله. آلدادیب خلقی سویان خان، کیم اولور اولسون آی الله! یالانین اؤز بئلینه هر ایکی دنیا پالان ائیله. قویما ملت قویون اولسون بو قودوز قوردون اَلینده ظلمو ییخ، یاخ یوواسین، ییغدیغین آنجاق سامان ائیله! داها قیر، قیرگئجه‌نین قیرماغین، آزاد ائله خلقی گتیر آیدینلیغی، تاریخ بویون اویغون زمان ائیله. قوی حقیقت باغینا شعردن « ا ِلیـار» قاپی قورسون یاردیم ائت، اؤز قلمین شعرینه دوزگون دابان ائیله. .