آنلادیـم

عشقدن من آنلادیـم جان ملکو سلطانسیز دئییل هر یارانمیش شکر ائدیر جانانه چون جانسیز دئییل. گؤزلری آلدیم قینیندان بیر تماشا کویونا هئچ زمان عشق اؤلکه‌سی، گؤردوم مسلمانسیز دئییل. شوق آتیندان دوشمه دیم، گزدیم خیالین داغلارین عشق ایله گؤردوم بو داغلار جاندا جئیرانسیز دئییل. من کؤنوللر کعبه سین هردن طواف ائتدیم داها آنلادیم هئچ بیرکؤنول حاجی‌سی عرفانسیز دئییل. حاضر اول کؤنلوم! یارین عشقینده قربان اولماغا چون مناسی عشقی‌نین، دنیاده قربانسیز دئییل. یاخشیلیقلار سنده قوی سونبول کیمی دَن باغلاسین عشق ایله جاندان بیتن سونبول، ده‌ییرمانسیز دئییل. یاخشیلیقدان، گؤزله یولسوزلار سنی اومسوتماسین چون اونون هئچ داملاسی عقباده عمّانسیز دئییل. سون گونون پیس گؤستریر دنیاده عبرت گؤزگوسو ظالمین دوزدورکی، دنیا بختی میدانسیز دئییل. حکمتیندن نیسگیلین جان سورودو ؛ جانان سؤیله دی درد اؤزو درماندی بیل، هئچ درد درمانسیز دئییل. باغلادیم معشوقه بئل؛ دنیایه کؤنلوم اویمادی بیلدی دنیا اهلی‌نین، سئوداسی شیطانسیز دئییل. عشق بیر بال دیر دئییم، جان سانکی بیر شان دیر اونا شان دا بالسیز اولسا، بال هئچ بیر زمان شانسیز دئییل. گَل شراب آل عشقدن؛ ایمان قوی آخسار دوشمه سین « اِلیـار»! ایمان عشق سیز دؤشلرده، بیل، مانسیز دئییل. .