سیناق

سالیب دیر اود جانیما، ازلدن عشقی یارین خیالدا جان قوشو دا، گزیر یارین دیارین. سوسوز قویوبدو منی، آلیبدی بیر طرفه اؤنومده بول هوسین، آچیب سرین سولارین. سیناقدایام بیلیرم، یاواش- یاواش او گؤزل چیخارداجاقدی منیم، جانیمدان عشق عیارین. خمار باخاندا منه، منی اؤزومدن آلیر منیم تک عاشقی نین، قورور تئلینده دارین. گؤزللییین گؤزه سی، گؤزونده هرگؤزلین عاشقلارین گؤزو چوخ سئور گؤزون خمارین. وصاله یئتمک اوچون، گرَکدیر آی کؤنولوم کی اورتادان آلاسان، اؤزون هوس دووارین. گرَک بلایه دؤزم، بلاسیز عشق اولماز بلا چؤلونده گؤرر، هر عاشق اؤز چیخارین. بو سؤنمه‌یَن اودونون، علاجی یانماق دیر اود اورتاسیندا یاریم، قوروبدو جان بازارین. بیشیرسه عشقی منی، گؤررسن آی کؤنولوم جانیم دا، من ده غمین، یاخاندا جان- جییارین. اودوزسا کیمسه وارین، بو باشدا سئوگیلییه او باشدا بیل کی، یقین، اودوب فلک قومارین. کیم ایسته ییرکؤنولو، کی عرشی فرش ائله سین بو یولدا وئرمه‌لی دیر، قیلینجا شاه دامارین. سیناقدا کیمسه یارا، آپارسا دوغرو کؤنول سونوندا یاردان آلار، سعادتین آچارین. سازاق سیخاندا منی خزاندا بولبوله تای کؤنول سالیر یادیما، یار عشقی‌نین بهارین. آپارسا « اِلیـار»ی دا دالینجا غمزه لری وئرر اَلیندن اونون یولوندا هرنه وارین .