آی یـار

گؤز آچان‌دان منی زلفونده چکیبسن دارا یار ! منی یالقیز بوراخیب، سؤیله گئدیرسن هارا یار ! یاندیرار باغریمی نیسگیل کؤزو سن آیریلسان ائیله یَر سینمی هجرین زهَری مین پارا، یار ! جانیما دوشمه سه بیرگون ایشیغین عالمده باسار آنجاق کؤنولو هرگئجه-گوندوز قارا، یار ! آزارام هم ده یولوندان، ایترَم ظلمتده دوشسه بیرگون من ایله عشقه بیر آددیم آرا، یار ! آرزودور غمزه لرین قلبیمی آماج ائله سین اوخ اولوب سینمه وورسون ابدی بیر یارا، یار ! سیناییرسان اوزون ایللردی منی محنتده گَل بو محنتده ده سن عشقینی مندن آرا، یار ! یولوما گؤر نه دوزاقلار قورولوب شیطاندان منی اوندان قورویارکن، داها گؤستر چارا، یار ! نه گؤزل، تایسیز اوغوردور سنه قربان اولماق قسمت اولسون بو اوغور، آرزوسودور، « اِلیـار»‌ا یار ! .