یامـان زمـان

گونلریمیز ایندی نه‌دَن دیر یامان گلیر گون توتولور، گؤز قارالیر، هئی دومان گلیر. چالخالاییر داغلاری ظلمت قاسیرغاسی توز آراسیندان قولاغا الامان گلیر. اؤلکه‌ده آسلان‌لاریمیز بیر- بیر اوخلانیر تولکولر آسلان یئرینه ارسلان گلیر. یاز نفسین، قیش بوغور آنجاق بو اؤلکه‌ده گول یئرینه شاختا بیزه ارمغان گلیر. شاختا سیخیر، یاخشیلیغین قیوریلیر جانی هرنه یامان وار جانینا سانکی جان گلیر. آتلی سازاق گؤر نئجه جولان وئریر یئنه سئوگی‌لرین گول باغینا بیر خزان گلیر. قانه باتیب دیر وطنین گنج اوغول‌لاری ذاتی قیریق‌لار نئجه گؤر پهلوان گلیر ! یوخدور ایییدلر هایینا، های وئرن بوگون اَسکی زمان یولچولاری ایندی خان گلیر. قارغا سسی باغدا بوغور بولبولون سسین سؤیله نـه‌دَن قارغا باغا قوش قووان گلیر؟ بوغدا بیتیر، خانلار اوچون دارتیلیر گئدیر بیرجه اَکین صاحبینه سار- سامان گلیر. ائل- اوبامی ظلم آجیسی آغلادیر، امان! گؤزلره باخ، یاش یئرینه گؤر نه قان گلیر. های‌دی قویون‌لار مله‌شیر، هاردا خان چوبان؟ ییرتیجی حیوان سورویه خان چوبان گلیر. کورکو ریا، یاشماغی تزویر اولان نه چوخ سانکی بولار یوردوموزا بیر ایلان گلیر. دینی ساتان شیخ بیزه اؤرنک دئییل، گؤزل! چونکو اونون کورگؤزونه چین، چاخان گلیر. دین کَره‌سین گونده یئییر، یاغلانیر بو شیخ دویماییر او، قارنی گؤزه بیر قازان گلیر. ذکر دئییر اوزده، گؤرورسن گولومسونور دالدادا اون کَندیسینه بیر سیچان گلیر. مسجده شیطان صفت انسان گلنده، من فکر ائدیرم گول باغینا بیر قابان گلیر. دوز یولا اویغون چاریق اَل‌دن گئدیر داها یاستی دابان‌لار یئرینه، دیک‌دابان گلیر. هرکسه دوزلوک یاراشیق دیر، نه‌دَنـدی کی چوخلارا دوز سؤز بو زمان‌لار یالان گلیر. هرنه تمدّن‌لر اَلی دون بیچیر بیزه بوردا یازیق‌لار بئلینه بیر پالان گلیر. گلدی بو ایش‌لر باشینا، اؤلکه‌مین نه‌دَن؟ من بونو سوردوم، دئدیلر:- یات، خوخان گلیر! وئردی نشان، یار بیزه قرآن‌دا جان باغین حقّـی دانانلار گؤزونه باغ، یابان گلیر. گؤر نه یامان دیر بو زمان، آی یازیق کؤنول! پیس یئرینه، یاخشی عمل خلقه مان گلیر. باغلا امید الله-ا کؤنلوم! داریخما چوخ ظلمون ائوین ییخماغا بیر قهرمان گلیر. حق سؤزو سؤیلر دیلیمی کسمه‌یین منیم حقّـی دویان ائل‌لره، « اِلیـار» اوزان گلیر. .