داغلی جـان

سیره چیخاندا گؤزلریم، دوشدو اوزونده بیر خالا داغلادی خال، خیالیمی، سالدی غریبه بیر حالا. قالدی خالیندا گؤزلریم، سؤز جووالیندا سؤزلریم دویغولاریم دا جومدولار، آل یاناغین‌دا بول بالا. لیلی‌یه تای یاراقلانیب، یئللره وئردی تئللرین ایسته‌دی قیسه تای منی، عشق‌ایله درده بیر سالا. اوندا منیم کؤنول قوشوم، قوندو یارین جمالینا جاندان اوچوب گئدنده بیر، تیتره‌مه دوشدو هیکالا. سونکو گؤروشده یار اوزون، توتدوکی، مندن آیریلا گئتمه دئدیم دایان گؤزل! غملری منده چاپ، تالا ! آیرلیغی بیتیر گؤزل! گؤزدن آشیر، ایتیر گؤزل! من سنینم نه دنیانین، وئرمه منی بو دجّالا. حکمونو یازدی بو فلک، آیریلیق اولدو بیر قدر ایندی ملک‌لر آغلاییر، مندکی غملی احوالا. کاش! یئمه‌یه‌یدی هئچ زمان، کیمسه بو دنیانین غمین کاش! داها اویمایایدی بیرکس بو یاراقلی رمّالا. عشقه دوداق بوزنلرین، هر زادینی آلار، ساتار عشقه دوشن یار عشقینی، ساتماز او کهنه بقّالا. عاشق اولان یاشامدا چوخ، بنزه‌یَر آنجاق آسلانا خوش دئییل آسلان آلدانا تولکویه، قوردا، چاققالا. ایندی یارین دالینجایام، سانکی گونشدی، من آیام ناز ائدَرَک آتیر منیم، هرنه واریمدی تونقالا. سئوگی قیلینجا بنزه‌ییر، باغلی یولو آچار منه غم قوشونو دوزولسه ده، قارشی‌دا گونده دال‌دالا. یار یولونون دیکَن‌لری، اوخلاسا دا دایان جانیم! عشق‌ایله یولدا سهل دیر، عاشقی گر ایلان چالا. آی گؤزلیم! دایان گلیم، سندن اوزولمه‌سین اَلیم اؤز یانینا گؤتور منی، عشق‌ایله گونده چولغالا. قوللوغونون‌دا حلقه‌سین، آس قولاغیندان « اِلیـار»ین باغرینا داغ چک عشقدن، قوی ابدی نشان قالا. .