73
گتیریب
گتیریب
نئجه پارلاق گونشی یارگؤیه قندیل گتیریب
یئره ده تورکونو اَن دادلی، گؤزل دیل گتیریب.
اَریش- آرغاجدا قویوب موسیقینین پردهسینی
اَریشین بَمدن آلیب، آرغاجینی زیل گتیریب.
یار موغاماتی چکیب عرشدن آنجاق بازارا
بئله بازاره کؤنولدن هره زنبیل گتیریب.
عشقی، دنیادهکی مشکللره اویغون بیر آچار
غملرین سینهسینه زهرلی قمچیل گتیریب.
غم چکن چاغدا قوشون، جاندا کؤنول کعبهسینه
یادا سال، یار، یادینی غملره سجّیل گتیریب.
سئویر اوزانلری قرآن اوخوسونلار جاندان
قرآنین نغمهسینه گؤر نئجه ترتیل گتیریب.
امر ائدیب گونده دولانسین فلک انسان باشینا
قویوب اوندان اجلی، عمروموزه ایل گتیریب.
یاشام انسانلارا سان، بیر برکت سفرهسی دیر
اونا بایرام گونوتک، نعمتین آجیل گتیریب.
هر ایشین حکمتی وار، بیل کی، بو اوزدن الله
بیرین آغ یا قارا یا بیر اوزو چیلچیل گتیریب.
گؤندریب بولبولو بوستانه، یاییب دیرگونشی
داغا ککلیک، باغا دا گوللو قرنفیل گتیریب.
هامی قابیل کیمی اولسایمیش، اؤلرمیش گوللر
قابیلین قارشینا چوخ یاخشی کی، هابیل گتیریب.
گتیریب دیر بیزه پای، عشقایله یار، هرگولدن
دئدیم « اِلیـار»! بو سؤزو، آنلا ، اینان، بیل گتیریب.
.
دیدگاهها (0)
هنوز دیدگاهی برای این شعر ثبت نشده است. شما اولین نفر باشید!
برای ثبت دیدگاه و شرکت در بحثها، لطفاً وارد حساب کاربری خود شوید.
نیاز به حساب کاربری
برای ذخیره اشعار در گنجینه شخصی خود، لطفاً وارد حساب شوید.