جانان ملکو

گَل آیاق قوی سئوگیلیم! هر یئرده سن جان ملکونه گَل، سنین عشقین ده‌یَر مین- مین سلیمان ملکونه. بیر قوناق گَل کؤنلومه آی کؤنلومون ائو صاحبی تاکی، من جان گؤندریم عشقینده قربان ملکونه. آچ صراحیدن ایچیرت عشقین شرابیندان منه عشق‌ایله قویماز آیاق جان بیر ده شیطان ملکونه. سئومرم دنیاده من اغیار اوچون بئل باغلایام باغلاسام، کؤنلوم گئچنمز بیر ده جانان ملکونه. آچمیشام باشدان بوگون من باشقا کس‌لرکؤلگه‌سین عشق تاجین وئرمرم دنیاده سلطان ملکونه. من گؤزل گؤزلرده هئی سندن گؤزللیک گؤرموشم گؤرمه‌یَن گؤز یول تاپانماز بوردا ایمان ملکونه. آلسا هرگول بیر نفس زلفوندن عطرین مست اولار یئل یاییب دیر شهرتین عالمده ریحان ملکونه. سئوسه کیم عشق عالمین بیلسین گرَک بیر نکته‌نی بیر گرَک‌دیر کی، آیاق قویسون او انسان ملکونه. غم حصارین گَل گؤزل! سیندیر، منی آزاد ائله چوخدو دردیم چک منی آنجاق کی، درمان ملکونه. باغری قان دیر « اِلیـار»ین، قورخورکی، سنسیز بیر زمان غم اونون کؤنلون سوره بیر کَز ده حرمان ملکونه. .