چالاغان چارداغـی

چالاغان چارداغی ائتمیش بو فلک دنیانی چالیر اؤز طبلینه هئی چارخا سالیر غوغانی. چالیر انسانی بو چارداقدا ؛ چاپیر احوالین بیر ده گؤردون ساتیر آرمود یئرینه هیوانی. چاتیب اوّل‌دن او محنت شله‌سین انسانه آشیریب آدمی یولدان؛ شاشیریب حوّانی. اوزانین قارشینا قویموش یئکه داش هجراندان قیسی مجنون ائله‌ییب؛ درده سالیب لیلانی. آغلادیر شانلی فلک هرگؤزو بیر درد ایله او بولوتلارکیمی گؤزدن اَله‌دیر دریانی. هر شاهی بیرنئچه گون بخت آتینا میندیرمیش سونرا آتدان یئره سالمیش یئنه‌ده پاشانی. تختی فرعونه وئریر، دوشمن اولور موسایه سامری‌لر اَلینه بایراق ائدیر حاشانی. اژدها سوندان ائدیر بیر دنیزی فرعونه طور سیناده تماشایه چکیر موسانی. بله‌میش چؤلده حسینین قانینا تاریخی تا علی اوغلو؛ علَم ائیله‌سین عاشورانی. یوخو گؤرموشدو قضا خلقه ازل صبحونده بئله تعبیر ائدیب آنجاق کی، قدَر رؤیانی. امتحان ائیله‌ییر الله بیزی تا بَللَنسین کیم تمنّاسین ائدَر حق یولونون قربانی. باشا « اِلیـار»! نه گلیر؛ حکمتی وار عالمده قویما گؤزدن گونشی؛ گئت اوخو بیر طاهانی! .