آرخـاداش!

جاندا گَل آرخاداشیم! یاندیراق عشقین چیراغین یاخشیلیق‌لارلا اونون آرتیراریق گونده یاغین. عقل اولان یئرده، بولانمازکی، محبت بولاغی قویمایاق اورتایا گَل، تای- توشوموزدان سالاغین. آرخاداشلیق گوجو، دوزلوکده تاپار معناسین بیرجه دوزلوکدو کسن هیزلییین آنجاق قولاغین. قورویار اَردمی؛ انسانی اوجالدار دوزلوک وئرر ایمان؛ یاشامین جاندا دورولدار بولاغین. گَل سن اول قول منه، من یول سنه دارگونلرده آشاریق بیر آیاق اولساق گئجه‌نین چنلی داغین. آرخاداشلیق، گؤزل ایلغاردی؛ شرف یوردوندا آلمایاق بیر- بیریمیزدن بو محبت دایاغین. جان بیر ائودیرکی، بو دنیاده قوناقسیز اولماز هرکس آلمیش ایچری کؤنلونه اویغون قوناغین. آرخاداش گَل بو ائوی تاپشیراق ایمان بزه‌سین بلکه جان یوردوموزا سئوگیلی قویسون آیاغین. باشدا یانلیز اریدر غم بوزون عشقین سیجاغی عاشق اول؛ عاشق اولان آتلاماز عشقین قوجاغین. گَل اولاق گول زمیسی بیز گونشین قارشیندا گون اولان یئرده قارانلیق چالابیلمز اوراغین. ای، اؤزللیک‌لره بوستان ائله‌سک بیز بو جانی دوغرو بیر عشق آرادان قالدیراجاق دیر آلاغین. گؤزو آج قارغایا بنزر کؤتو یولداش، آییق اول فرصت آردیندا دورار، دولدورا سندن چاناغین. قارغادان قوش قووان اولماز گوله « اِلیـار»! باغدا گوله بولبول گرَ‌کیر هر سحر اؤپسون دوداغین. .