قوجالیـق

آی اوغول سن بونو بیل، هرکس اوچون وار قوجالیق یاغدیرار هرباش اولا ساچلارینا قار، قوجالیق. آجیلیق چکسه قوشون هرنه زمان احواله داها قارشیندا اولانماز اوجا دیوار، قوجالیق. کیم جوانلیقدا گؤزون دیکسه فقط دنیایه قارالار باغری، اولار بختینه شاهمار، قوجالیق. گَل، جوانلیقدا آچاق یول بو قفسدن عشقه یوخسا دنیانی ائدر کؤنلوموزه دار، قوجالیق. ایپه‌یاتماز آتـا بنزرسه جوانلیق کیمده بونو بیلسین ووراجاق آغزینا افسار، قوجالیق. گنجلیک اینجیسینی خرج ائله‌سن دوز یولدا هئچ زمان اولمایاجاق دیر سنه بیر عار، قوجالیق. گؤزگودور، گؤسترر عالمده اؤتَن احوالی آرایان گؤزلره صدق ایله اولار یار، قوجالیق. بیر قازان دیر کی، دولوب تجروبه دن، عبرتدن عاقل انسانلار اوچون گؤر نئجه قاینار، قوجالیق. گنجه دیر، گنج‌لییین اوندا یاتیب معناسی گؤر کمال اهلینه اولموش نئجه بازار، قوجالیق! سون بهاریندا دا « اِلیـار»! اَلی یاردان اوزمه عشق اولورسا، اولاجاق کؤنلـونه بیرتار، قوجالیق. .