یا علـی!

یوکسه‌لیب، گؤیلرده سن اولدون ثریا یا علـی! ظلمتین باغرین یاریب، اولدون هویدا یا علـی! حقّی آیدین گؤسترن بیرگؤزگوسن عالم‌لره سنده باش معنایه کان دیر، سینه، سینا یا علـی! سن دوغولدون عشقدن بیرگون، گونش تک پارلادین هم گؤزللیک‌لر سنه هم عشق، شیدا یا علـی! بیر ایشیق یایدین جانیندان سن محبت ملکونه گؤیلره دوشموش بو اوزدن گؤرنه غوغا یا علـی! چوخ زمان گزدیم تاپام انسانلیغین معناسینی گؤردوم انسانلیق تاپیب دیر سنده معنا یا علـی! هرگؤزللیک سنده الله- دان اؤزل بیر جلوه دیر اولموسان یوسف، یارانمیشلار زولیخا یا علـی! آتمادین بیرکز ده سن، اَلدن عدالت بایراغین عشق ایله ایمان اولوبدور سنده تئیخا یا علـی! اَیمه‌دین هئچ بیر زمان سن باش قارانلیق شاهینا حق اوچون آلدین قیلینج، اولدون مهیّا یا علـی! اَن جومار بیر اوزگوچو اولدون یقین دریاسینا الله- ی هر زاددا چون ائتدین تماشا یا علـی! هم امامت شاهیسان، هم بیر نبوّت قارداشی آی دیانت تاجینا هرکسدن اولا یا علـی! رتبه بیرگون باغلاسا معشوق اؤزو عاشق‌لره سن اولارسان رتبه ده هرکسدن اعلا یا علـی! یانماییر، سونموش عدالت شمعی چوخدان اؤلکه ده گَل یئنه یاندیر اونو، آی خلقه مولا یا علـی! بیل کی، انسانلیق بوگون اؤکسوزدو سنسیز دهرده چاره قیل بو درده گَل اول بیر مسیحا یا علـی! یوخلایاردین سن یازیق انسانلاری عمرون بویو قیل کرم، بیرکز ده سن محشرده یوخلا یا علـی! « اِلیـار»-ا یـار اول، سنین عشقینده دیوان باغلاسین پارلاسین اولدوزکیمی، تا واردی دنیا یا علـی! .