نـه‌دَن؟

گؤر نه‌دَن انسانلیغا آزدیر بوگونلـر مشتری دوزلویو اؤلدورمه یه چوخلار تاخیبلار خنجری. سوسدورور بولبوللری قیش گؤندرن یولسوز سازاق ایسته‌ییر بولبول دؤنـوب اولسون قارانلیق عسکری. وارلی واردیر، توخلوغوندان آختاریر بیر جان اوغان چوخلو یوخسول وار آجیندان بیر سوموکدور، بیر دری. ایندی یوخسوللوق آغیر قار تک باسیبدیر دام- داشی چوخ چتین دیر دول قادین تاپسین یاوان بیر بربری. بیر قادین قوللوق ائدیر بئش کور قیزا، آخسار اَره ناز ائدیر بیر آیریسی، هئچ سئومه ییر پولسوز اَری. غم، قودوز بیر قوردا تای هرگون سؤکور یوخسوللاری آیریلار وار اوینادیر ساحلده باخ، مین بیر پری. آلتی یاندان یاغدیریر هرگون قارانلیق، ظلم اوخون هاردادیر مظلوملارین وجدان کی، اولسون سنگری؟ دنیانین سارساقلاری اولموش قارانلیق قوللاری هم ده گؤر یالتاقلاری اولموش ده‌یَـرسیز عنتری. آرزودور باتسین قارانلیقلار، ییخیلسین ظلم ائوی ظالمین سینسین بئلی، فقرین پوزولسون دفتری! پارلاسین باتماز گونش، جوشسون محبت قایناغی بیر سپیلسین عالمه هرگون عدالت عنبری. هانسی اَل، هانسی قلم خلقین یازیر بختین قارا سینسین اول اَل هم قلم، دوشسون داغیلسین جوهری! یول تاپا بیلمزلر آنجاق موتلولوقلارکویونا اولماسا انسانلارین مولا علی تک اولکری. مینمه یولداش! قورسالار بیرگون ریادان بیرگمی چون ریانین بوردا هم عقباده یوخدور لنگری. آل گؤتور دیوانیمی، قیل چاره انسان دردینه قویما توز آلتیندا قالسین « اِلیـار»ین حق سؤزلری! .