خال

حکیم! آل گؤر نه‌دیر دردیم؛ حیاتیم بیر خیال اولموش کؤنول جنتده، جان اوددا، بو حالیم گؤر نه حال اولموش؟ قراریم یوخدو؛ گؤز اویماز؛ یاریمدان باشقاسین دویماز جانیم مین درده عشقیندن، دئیرسن بیر جووال اولموش. بوگون هجراندا یانسام دا، وصالین شوقو وار باشدا بو اوزدن دیر منیم آغزیم دا هجرین زهری بال اولموش. یارین جان قایناغیندان جان، جامین بیل دولدورار هرگون اونون هر لطفو بوینومدا گؤزل بیر گوللو شال اولموش. عدم یوردوندا معناسیز بوغولموشدوم قارانلیقدا آلیب اوردان منی، معنا وئرن بیرگول جمال اولموش. حیاتیم، آنلادیم آرتیق، چتین بیر یولدو دنیاده چتینلیک لر بو اوزدن دیرکی، مقصد بیر کمال اولموش. بدن بیر دار قفس دیر، من توتولموش بیر قوشام اوندا توخونموشدور قضادان تور؛ دنی آلتیندا خال اولموش. یارین بایغین سالان زلفون، دئییم بیرگؤرسه گؤیچک لر گؤررسن چوخ اوزون دیللر اونون قارشیندا لال اولموش. ایشیق، اوندان آلار هرگون بوتون گؤیلرده اولدوزلار اونون قارشیندا گون سیزمیش، قارانلیقلار زوال اولموش. باشین عشقین قیلینجییلا، آلین تئز منلییین جاندا غنیم دیر عشقه چون منلیک؛ قانین تؤکمک حلال اولموش. سونوج، آیریلسا کیم یاردان، بوغولماق دیر قارانلیقدا گونشدن دیرکی، آی گؤیده گزرکن بیرهلال اولموش. یاشیل جنت دیرآی « اِلیـار»! اورَکدن یازدیغین دیوان غزللر سانکی دیواندا، گؤزللیکدن غزال اولموش. .