عشقی گؤندر!

عشقی گؤندر، یا منی قارشیندا قربان ائیله سین یا قارانلیق کؤنلومو هرگون خراسان ائیله سین. تختدن سالسین غمی، وئرسین یئله لباده سین قالدیرارکن بایراغین کؤنلومده جولان ائیله سین. آلسین اغیارین اَلیندن مندکی جان ملکونو آی گؤزل! یانلیز سنی سینمده سلطان ائیله سین. جاندا بوغسون ذلتی، قیرسین گناهین حلقه سین قویماسین نفسیم سنین کویوندا عصیان ائیله سین. یازگتیرسین،گول گولومسونسون، بولاقلار آغلاسین یاخشیلیقلار کؤوشنین هر یئرده بوستان ائیله سین. چوخدو دردیم، یالقیزام، بیر یوخلایان یوخدور منی قوی گلیب هر دردیمی بیر یئرلی درمان ائیله سین. بنزرم شیطانه من، سینمده عشقین اولماسا عشق گلسین قوی منی دوز یولدا انسان ائیله سین. عشق اوجالدارکن منی، قویسون یاییلسین شهرتیم شیطانی قیسقاندیرارکن، باغرینی قان ائیله سین. بیر اود اولسون سؤنمه یَن، هرگون اوجالسین شعله سی کفرو یاندیرسین، کولون کؤنلومده ایمان ائیله سین. قبله نی بیر ائیله سین، هرکس نظر قیلسین سنه محتشم انجیلی هم توراتی قرآن ائیله سین. عشق ساحلسیز دنیزدیر، مندکی جان بیرگمی اذن وئر سینسین گمی، دریا بوراغان ائیله سین. قوی سو آلسین عشقدن « اِلیـار»دا شعرین قایناغی دفترین عشق ایله بیرگون گوجلو دیوان ائیله سین. .