مسلمان عسکر

دنیایه آذربایجانین، عشقییله بیرگون گل‌میشم من دؤش‌لریندن سود اَمیب، بیرگول کیمی دیرچل‌میشم الله بیلیر قوینوندا من، داغلارکیمی یوکسل‌میشم فرهاده تای شیرینیمین، عشقینده داغلار دَل‌میشم اؤلکم دیر اسلام اؤلکه‌سی، من بیر مسلمان عسکرم. دوشمن چکیب دیر خنجرین، تا اؤلکه‌مین آلسین جانین ایندی حلال اولموش منه، دوشمن‌لرین تؤکسَم قانین عشقینده اؤلسم چولغایار، آل‌لاله‌لر هر بیریانین قوی دالغالانسین بایراغی، دنیاده آذربایجانین دوشمن‌لرین قارشیندا من، اسلامه قالخان عسکرم. حقدن آلیب دیر اؤز گوجون، دنیاده تورکون اوردوسو پارلاق گونش‌تک پارلایار، عالم‌ده هرگون اوردوسو دینه دایاق دیر هر زمان، تورکون بو دوزگون اوردوسو هر بیر زمان بئل باغلایار، بیر حق اوچون چون اوردوسو آنجاق بئله اوردو دا بیر، غیرتلی اوغلان عسکرم. دنیاده آذربایجانیم، آسلان‌لارین جان یوردودور هر دوستا گلشن دیر بورا، هر درده درمان یوردودور هم بیر مسلمان اؤلکه‌سی، هم دوغرو انسان یوردودور آنجاق باریشماز دوشمنین، قارشیندا بیر قان یوردودور باسقین یاپان دوشمن‌لرین، قارشیندا آسلان عسکرم. قیش شاختاسین گؤسترسه ده، غم‌دن، آغیر قار سَرسه ده اؤلکمده وورغون گول‌لری، یولسوز قارانلیق درسه ده من توپراغیمدان گئچمرم، دوشمن جفا گؤسترسه ده باش اَیمرم قارشیندا من، حق‌سیز قوشون گؤندرسه ده چون قهرمان تورک اوغلویام، من حقّـه قربان عسکرم. ییرتار قارانلیق بایراغین، گئچمز داها واز ائل‌لریم بیرگون ائدر بو اؤلکه ده، قیش فصلینی یاز ائل‌لریم قیمت وئرر اؤزگورلویه، غم‌دن اوسانماز ائل‌لریم تورک اؤلکه‌سین بیرگون ائدر، بیر گوجلو قافقاز ائل‌لریم عمروم بویو بو ائل‌لرین، عشقینده حیران عسکرم. بیرگون بیز الله- دان آنا ! آلدیق جان آذربایجانا ایندی اورَکدن قوی دئییم، جان قربان آذربایجانا « اِلیـار» دئییر سن آی اورَک، یانسان یان آذربایجانا قوی شاه‌داماریم‌دان منیم، آخسین قان آذربایجانا هرگون من آذربایجانا، جاندان دئیَن جان عسکرم. .