عشق آچاری

بیرگئجه یارین اَلی، عشق‌ایله یار اولدو منه هرنه وارلیقدا یوخ‌ایدی؛ نئجه وار اولدو منه. ناز ایله گلدی منیم کؤنلومو مجنون ائله دی ابدیت بویوجا، شانلی نگار اولدو منه. یار اوزون آچدی منی چکدی محبت باغینا بو باغین هرگولو قیمتلی بهار اولدو منه. عشقی‌نین گوهرینی قویدو اورَک صاندیقیما بو امانت نه اوچون گؤر کو، دچار اولدو منه. عرشه قالدیردی منی عشق‌ایله حلاج کیمی گؤر نئجه شانلی بویو ، گؤرمه‌لی دار اولدو منه. ایسته‌ییردی داها غم کؤنلومو تاراج ائله‌سین یارین آیدین باخیشی، گوجلو حصار اولدو منه. قرب- قدریم یوخ‌ایدی عشقسیز عالم‌ده منیم عشقسیزلیکده گئچن گونلریم عار اولدو منه. گئتمیش‌ایدی جانیمین طاقتی اَل‌دن نه یامان یئنه هر غمزه‌سی بیر قانلی دامار اولدو منه. ائله کی، ایزله‌دی کؤنلوم یاری، جان آلدی جانیم بو حیات عرصه‌سی بیر آیری دیار اولدو منه. عشق صبحوندکی یئل، آچدی غزل دفترینی اَسدی یار زلفونه بیر نغمه‌لی تار اولدو منه. باغلی قالماز اوزومه بیر قاپی‌دا معناده عشق هر باغلییا چون گَلدی آچار اولدو منه. تؤک آی « اِلیـار» اَته‌ییندن داها دنیا داشینی باخ کی، دنیا هوسی، گؤر نه غبار اولدو منه! .