عشقین بولاغی

گئجه‌نی سیخدی یارین بیر آیا بنزر یاناغی جلوه‌سی اولدو بوتون عالمه عشقین بولاغی. گونو گولدوردو؛ قارانلیقلاری پشمان ائله دی اولدو جان، جانلارا عالمده بو عشقین سیجاغی. وارلیغی ائیله دی بوستان ائله کی، جان جامینا بیر صراحی کیمی مِی تؤکدو یارین دیل- دوداغی. بیرگؤزل دیر بو صنم ؛ حاجتی یوخدور یاراغا اولدو هر جلوه‌سی عالمده گؤزللر یاراغی. او قدر اینجی تؤکوبدور اَته‌ییندن عشقه هئچ زمان اؤلچه‌ده بیلمز فلکین قیرچاناغی. ائله بیر عقل آپاران ساچ، ساچیب عالم لره کی حکمتیندن داها، هئچ بیر زاد اولانماز داراغی. ابدی تاج ائله دی آدمه عشقین بو گؤزل شیطانین صبحه قدر سؤندو بو اوزدن چیراغی. اوره‌یین داغلاسا هرکیمسه‌نین اؤز عشقی ایله اؤلسه‌ده گئتمز اورَکدن داها عشقین بو داغی. عاشق اولسان، باشینی آلدادابیلمز دنیا عشق ائدر عاشقی عالمده حقیقت قوناغی. ائله بیر ذیروه‌یه یوکسلدر اونون بخت آیاغین جبرئیلین ده اورا هئچ چاتابیلمز آیاغی. کیمسه کی، دادماسا یار غمزه‌سینین شهدیندن دوغرونو گؤرمز اونون گؤزلری؛ دویماز قولاغی. یاشا بیر عشق‌ایله « اِلیـار»! دؤز آغیر هجرانه گله‌جک مژده‌سی وصلین، بیته‌جک غم سیناغی. .