آی سئوگینین یازانی!

یا گؤندر عشقدن می یا مندن آل بو جانی یاکؤنلومو سیغیندیر؛ یا غمدن آل امانی. سنسیز غمین اَلیندن باخ گؤر نه تور توتوبدور کؤنلون گؤیون بوگونلر آهین آغیر دومانی! چیخمیش چیبان حیاتین شیطان اؤپن یئریندن بیرچاره قیل کرمدن، قالدیر بو تور چیبانی! یاندیر گؤزل یاریم بیر میخانه نین چراغین قوی اوردا جان سیغینسین غم سالدیران زمانی. یاندیر منیم جانیمدا عشقین اودون؛ او اوزدن بیر قایناسین کؤنولده جان دویغومون قازانی. آنجاق مِیین هواسین ، چکسم‌ده هر جفاسین قالدیرما سن دؤشومدن، آی سئوگی نین یازانی! جان آیریلار کدردن؛ عشق اولسا هرکؤنولده اوندان سوزر قارانلیق، کیبرین یاتار دابانی. دان اولدوزون گتیر، قوی بیتسین داها قارانلیق آیدین سحر دوغولسون، گوللر دئسین اذانی. شیطانه چوخ اَییلمه دنیاده سن آی انسان! سوچلار چؤلونده یوخسا، ائیلر هوس چوبانی. بوستانه بنزه ییر جان؛ تقوانی گَل حصار ائت قوی گزمه سین ایچینده شیطان کیمی قابانی. یارب! حیات ایچینده ایمانی بیر دایاق وئر قوی منده یاخشیلیقلار بوغسون داغار یامانی. خرمنده خیر ایشیم، دَن؛ سوچلار سامان ساییلسا قالسین دَنیم سوورسون رحمت یئلین سامانی. سن لطف قیلدین الله! آنلاتدین عشقی بلکه « اِلیـار» اورَکدن اولسون عشقین اؤزل اوزانی. .