آی گونَش!

جیر قارانلیق پرده سین، آش چنلی داغدان آی گونَش! گَل سئویندیر، خلقه وئر یایغین ایشیقدان پای گونَش! چولغاییب دیر عالمی سنسیز قارانلیق دهشتی اَل وئریب شیطانه چوخلار، غم سالیب دیر های گونَش! قیش، آغیر قیش دیر، منیم آغزیمدا چوخ سؤزلر دونوب آل اَلیندن شاختاسین، قیش دؤنسون اولسون یای گونَش! غم قارین داغلاردا آغلات، یایلالاردان گؤز یاشی آخسین، اولسون قوی اَتک چؤللرده چیلغین چای گونَش! گَل، بوتون گوللرگولومسونسون بو دالغین کؤنلومه قوی سئوینجین شمعی یانسین، غملر اولسون زای گونَش! آل سازی سیرتیق سازاقدان، قارغانی سال ذیروه دن بولبولون جان نغمه سین هر یاندا آنجاق یای گونَش! سن بیر اؤرنَکسن، حقیقتدن آلیبسان جلوه نی بیربئله معناده بیر آیسان، یوخوندور تای گونَش! « اِلیـار»ین دیوانی دا سنسیز، قارانلیق کؤلگه دیر ساچ ایشیق، دیوانی هر محفل‌ده اولسون «آی»گونَش! .