قورتولوش

سؤنوبدو سانکی جهاندا عدالتین چیراغی غمین، یازیقلارا یوخدور جهاندا بیر قیراغی. جهانی چولغالاییب دیر قارانلیغین بولودو ایشیقلی بیرگونه یوخدور، آزانلارین اومودو. سینیبدی « زهره» نین آرتیق اَلینده سؤزلو سازی بویاندی قانه آی ائللر! یئرین یاشیل پالازی. هارای چکیر آلاقارغا، کار ائیله ییر قولاغی دئشیر دوشونجه می غملر، بولاندیریر بولاغی. اؤزون یئتیردی سازاق دا، یاراقلاناندا خزان کی، باغدا گوللری ائتسین خزَل کیمی ورَزان. بو، اولدو بولبوله نیسگیل، بوغولدو باغدا سَسی سارالدی رنگی بو غمدن، دار اولدو جان قفسی. آلیبدی شاختا حیاتی، جهانی قیش بورویوب دونوبدو جاندا نفس لر، عمر یانیب، چورویوب. اَییلدی ظلمه بویونلار،تمدنون آدینا باخیر بو خلقده شیطان، جهالتین دادینا. جوشور بو توزلو جهاندا حقیقتین بولاغی ائشیتمه ییر سسین آنجاق، تمدنون قولاغی. دینین باغیندا گؤرورسن بو دنیانین یالاغی دیکن کیمی اولوب آرتیق بو بوستانین آلاغی. او، قوردا تایدی، گئییب دیر بوگون قویون دریسین اولورسا وجدانی بیرگون، گرَک اؤلوب، اَریسین. آی الله- ی سئون انسان! جهانه اویما داها آتار، ساتار سنی بیرگون، اورَکده باخماز آها. سیغینسان الله- ا شیطاندا سندن اوموسوناجاق چاغیرسا بیرسنی دنیا،گؤررسن اودقوناجاق. نه ظالم اول بو جهاندا، نه ظلمه سن بویون اَی قیلینجی، قالخانی یِـئردن گؤتور، قارانلیغا دَی. دان اولدوزو چیخاجاق دیر، گَلنده یار سوراغی قارانلیغی بیچه جکدیر اویاقلارین اوراغی. قیزیل ساچین یایاجاق دیر حقیقتین گونشی جهانی توپلایاجاق دیر عدالتین عطشی. اینان کی، ظلمون ائوین بیر امام گلیب ییخاجاق قارانلیغین بوغازیندان، ایشیق توتوب، سیخاجاق. بو ظلمدن، بو دوماندان حیاتی قورتاراجاق یازین یولوندا آچارکن، قیشین داغین یاراجاق. خزاندا سارسیلان ائللر، یاشیل دونون گئیه جک جهاندا عشقینه هرکس، اورَک سؤزون دئیه جک. دؤز « اِلیـار»! اولسا دا اولسون، یئرین غمین بوجاغی قوی اولماسین سنه شیرین، بو دنیانین قوجاغی. .