آی شوشـا !

یوردوموزون باشین‌دا بیر، شانلی نشان‌سان آی شوشا! تورک ائلینین جانین‌دا بیر، سئوگیلی جان‌سان آی شوشا! آرزوم اودور گؤرم سنی، بیر سن‌ایله قوجاقلاشام سن بو جهان‌دا سانکی بیر، آیری جهان‌سان آی شوشا! قافقاز اولورسا بیر صدف، سن باغیرین‌دا اینجی‌سن سن قاراباغ‌دا گؤزلره، سرمه یاخان‌سان آی شوشا! قیرگئجه‌نین گؤیونده بیر، سنسن ائلین دان اولدوزو ملکونه هر تمدّونون، بیر خراسان‌سان آی شوشا! مین‌لر ایلین تمدّونو، سن‌ده چوخ ایز قویوب گئدیب چون باجاریقلی بیرگؤزل، دوغرو اوزان‌سان آی شوشا! سن‌ده باخاندا قامته، بؤرکو دوشور گؤزل‌لرین یادلارا سن قوشولماسان، چون بورادان‌سان آی شوشا! تاریخ ایچینده شاختالار، دوندورا بیلمه‌ییب سنی اؤلکه‌ده چون آرازکیمی، بیر جریان‌سان آی شوشا! سن اوتوز ایل اسیر اولوب، ائرمنی‌یه باش اَیمه‌دین چونکو مسلمان اوغلوسان، داغلارا خان‌سان آی شوشا! آزاد اولاندا سن شوشا ! تورک ائلی دؤندو بیر قوشا ائل قانادین‌دا چیرپینان، قیرمیزی قان‌سان آی شوشا! گؤر نئجه بیر قودورموشون دیش‌لرین اَزدی اوردوموز ائل سنه، سن ده ائل‌لره، بیر ساوالان‌سان آی شوشا! اویناسا دا ایتیب، گئدیب، جیدیر دوزوندن ائرمنی ایندی اونون گؤزونده بیر، قانلی دیکان‌سان آی شوشا! بال کیمی تورکو دیل سوزور، جان قلَمین‌دن « اِلیـار»ین دفترینه یازیرکی، سن بو بالا شان‌سان آی شوشا! .