دؤنوشوم

عشق‌ایله جان داملاسین دریایه دؤندردین گؤزل! باغریمین سوسقونلوغون غوغایه دؤندردین گؤزل! جلوه دن، سؤنمز بیر اود سالدین بو آلغین سینه مه کؤنلومون قارشیندا بیر سینایه دؤندردین گؤزل! باغلامیشدیم سنله بیر ایلغار « اَلَست»ین آخشامی هرنه سؤز وئردیم اونو امضایه دؤندردین گؤزل! بیر خرابات ائیله‌دین عالم‌ده ایمان اؤلکه‌سین اوردا عشقین شربتین، صهبایه دؤندردین گؤزل! اذن وئردین جاندا جولان ائیله‌سین عشقین غمی کؤنلومون خوش گون‌لرین، بلوایه دؤندردین گؤزل! بیر سیناق اولسون دئیه، جنّت‌دن ائندیردین منی بوردا اوستون جنّتی، دنیایه دؤندردین گؤزل! سن « علی» تک اؤندری یاخدین، یاراتدین عشقده دوغرو بیر عشق عسکرین، مولایه دؤندردین گؤزل! عشقی پارلاتدین گونش تک، ائل‌ده بیر چیرکین قیزین جلوه‌لندیردین آدین، لیلایه دؤندردین گؤزل! قیسی مجنون ائیله‌دین، لیلایه وئردین جلوه‌نی دنیانی مجنون اوچون، صحرایه دؤندردین گؤزل! سن بیر اؤکسوز کؤرپه‌نی آلدین دنیزدن، دیکله‌دین دشمنین قصرین‌ده بیر موسایه دؤندردین گؤزل! عشقدن الهام آلار هرکس حیاتین آنلامین عشق بیر زهر اولسا دا، حلوایه دؤندردین گؤزل! سن گتیردین عشق‌ایله، آیدینلیغی جان ملکــونه « اِلیـار»ین کورگؤزلرین، شهلایه دؤندردین گؤزل! .